( أيمن ) من واحنا عيال وانا شبطان ف دراعك دايماً و إن حد سألني اسمك ايه او ساكن فين كنت بقوله إسأل ايمن أيمن أخويا و سندي ف عجْزي زي ما حضراتكم شايفين مين حيعارض حكمة ربه إحنا يادوبك بني آدمين شاء ربك و ف حكمه لطيف انزل من بطن امي كفيف بس رزقني بأخ كمان طيب جداً قلبه حنين...ايمن ايمن عمره ماسابني لوحدي كان بيروح الغيط مع والدي يسحب جابر اخوه ف ايديه انا جابر علي فكرة ده اسمي دايماً بنسى ماقولش عليه ماهو مين بينادي عليا و دايماً اللي يعوزني بيسأل ..... ايمن جوة الغيط بلعب ف مكاني وآدي ايمن واقف شغال مش حقدر اوصف شغله اكيد بس انا عارفه واد حمال علشان لما بييجي ياخدني و يسحبني نروّح عالبيت عرقه بيبقي مغرق ايده اللي شقوق كفها حدوتة تحكي ازاي ايمن شقيان مع ان إحنا لسه عيال وكبرنا وايمن على وضعه حملي و حِمل البيت علي كتفه ابويا اتوفى و امي وراه ومحسيتش الوحدة نهائي كانوا غاليين علي قلبي اكيد لكن ايمن كان ترياقي لما اتوفى الحاج حسين كان فايت اربع فدادين الحج حسين ده ابونا صحيح من غير ايمن راسي بتسيح طب فين ايمن وانت لوحدك راح فين ايمن ايوة صحيح ؟؟؟ لما الورث اتقسم بينا فات كام يوم قعدوا هو واهل مراته معايا ف دارنا يطلبوا مني اوكله يبقى كبير دوارنا قولتلهم..... طول العمر وانا عكازي وسندي ف ايده لو اطول اني آخد من عمري وازود عمره يبقى حازيده و ف نفس الليلة مرته لقيتها بتزّعأ فيه بتقوله ماتنهي الموضوع امك ماتت .... مش حيصح يتنه اخوك ف الدار مرزوع فات كام يوم ايمن حاسه مابقاش هو صوته بيكدب حاسس انه مغير جلده برة و جوة مابقاش صافي زي زمان اخويا ف حبه مبيمثلش بس انا قلت اكيد الدنيا دايسة عليه طبعها آسي و مبتعتقش جاني بعد صلاة الفجر قالي ماتيجي معايا يا جابر ننزل مصر عايزين نقرا الفاتحة لابوك ف مقام الست رحت معاه .... صلينا الفرض ضهر و عصر و برغم النور الضايع ف عنيا حسيت ف عيونه كلام ليا مش قادر ينطق بيه لاكن و لاول مرة محسش منه بحنية صلينا المغرب وخرجنا لبسني الشبشب كالعادة وقالي استنى هنا يا جابر انا عاوز اجيبلك سجادة سجادة الصلاة عندك دابت انا ثانية وراجع متمشّيش مش عارف ليه وقتها حسيت انه محيجيش وبقالي يومين عند الجامع الناس تسألني و مبردش عاوز اصرخ فيهم معرفتش اصل انا متعود من صغري اللي بيعوزني ميسألنيش يسأل ايمن وانا حفضل هنا قاعد دايماً مستني قصاد باب الجامع مستني يجوز ... يجوز يرجع ايمن وسيم السيد محمد عبد الخالق 01095040730
