ط
الشعر والأدب

قصيدة : إدمان لقاكى مشكلة .للشاعر / رضا أبو الغيط

إدمان لقاكى مشكلة

*****************

إدمان لقاكى مشكلة

فاقت رموز كل العلوم

والأسئلة

فاقت قانون وضًعه نيوتن

للجاذبية المُمْكنة

يا من سكنتى أضلعى

وغرستى سهمك

ف العيون المقفلة

وف كل يوم بتعقدى

بدموع عينيكى الدبلانين

آخر حلول المسألة

وتوصلينى للجفاف والإرتجاف

فأبدأ أخاف

على عقل قرب ينحنى

ف سنين عجاف

لجل ما يعرف ايه حصل

خلى الوداد غير متصل

بين نن عين اتكحلت يوم بالهوى

وعيون حبيب كات لك دوا

لجل ما يعرف مين نوى

يهجر حبيب صابه الضنى

أو مين بعمره اللى انفرط

حاول يحل المعضلة

ما اعرفش ليه

بتزيدى همى اللى امتطى

ضهر الكتاف

من يوم ما قلتى بعشقك

واحنا على سطح القمر

لحظة زفاف

طعم السعادة بالأمل

ما اعرفش ليه

واخده قرارك بالوداع

وبتركبى بحر الضياع

فوق ضهر مركب م الشقا

متشققة

من غير شراع

وتْحِلى وعدك بالسهر

وبتخرجى برة الوريد

اللى اشتهى كاس اللقا

وما داقش غير مُر الثرى

والنقورة

ما اعرفش ليه

تملى عاوزه ترجعى

بالحب كام خطوة لورا

والحل عندك – واللقا –

آخر فصول المهزلة

ما تقربى وتجربى

تسمع عيونك شكوتى

وأنين جراحى ودمعتى

ولا انتى خدتى ع الفراق

والحل عندك تهربى

ما تقربي .. وتجربى

تِبنى ما بينا بضحكتك

آخر جسور فن الثقة

وبلاشى تهادى بقسوتك

لعدونا

خيط الإشاعة المغرضة

وتٔمَكنيه م الثرثرة

يا من غزلتك معطفى

بدل قرارك تخرجى

خارج حدودى الممكنة

وتزيدى قلب المبتلى

بأمراض هواكى المزمنة

كان أولى بيكى تندهى

على عين تملى بتشتهى

تلقى ف ايديكى المبخرة

وتبخرى

قلبى اللى باع كل البنات

لجل العيون النيرة

يا من غزلتك معطفى

وجعلت قلبك مُنصفى

كان نفسى وحدك تعرفى

ان العيون المغرمة

من يوم لُقاكى أدمنت

ما ترد غير ع الأسئلة!!!!!!

*******************

رضا أبو الغيط

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى