قصيدة بالعامية (ارجع يا عطية )
يوه يوه يوه ياد ياعطيه
كليت دي ياواد انفار
ما مصدق والله عنيه
ونفوخي مني اهو طار
قدامي ولا ميت عربيه
وعماير تيجي خمسين دور
وصبايا مزغلله ف عنيه
ولا مرتت عُمدتنا سرور
لعبتلك ياد ياعطيه
دا بينك ياد عديت
وهتلبد هنا طوالي
ولا عدش لا قرف الغيط
ولا مرتي وغُلب عيالي
ياحلاوه ياد ياعطيه
الناس عماله تبحلجلي
ما آني لابس جلبيه قطيفه
والبالغه مفصله علي رجلي
وقفايا مدعوك بالليفه
يا حلاوتك ياد ياعطيه
يوه يوه يوه شايف ياعطيه
الزحمه ازاي في الاتوبيس
الراجل من فوقه صبيه
وحرامي .. ياخرابي الكيس
سرقوني وساكت ياعطيه
بالذمه مش تبقي عبيط
ولا نابني غير قلع عنيه
وبايني هرجع ع الغيط
ياخرابك ياد ياعطيه
كان نفسي اشوف اهرام خوفو
بس انت مفلس يا عطيه
يجي اهلي وناسي يشوفوا
عملولك ايه الحراميه
غلطان بصحيح ياعطيه
وكمان راح اوصي اخواني
دا مالكش كرامه ولا ليه
لو تهجر ارضك من تاني
علي رجلي راجعلك يا ارضي
اسقيكي بدمي وتسقيني
وولادي ومرتي وعرضي
والطينه اللي بتحييني
واهي توبه ياد عطيه
طارق البيه
فيسبوك
https://www.facebook.com/profile.php?id=100007841530124&mibextid=ZbWKwL
