قصيدة : إرمي أحزانك .. للشاعر / رضا أبو الغيط

إرمي أحزانك ف اليم

واهتم

بالفرح الطارح ف مطارح

مابتعرف غم

واوعاك م اللحن اللي بيعزف

ف ودان الصم

وان ناوى لسانك يتكلم

فالصدق ..أهم

وان هم الباطل يخرسنا

هنقوله إتلم

من إمتي الشر المتعلق

ف لسان الذم

كان خاف ع الناس اللي بتنزف

من عينها الدم

أو يوم اهتم

بأوجاع الشعب المتحزم

ببحور الهم

من إمتي الكرسي اللي بيسحر

عقل الإنسان

كان يوم اهتم

بدموع الأُم المشتاقة

تحضن وتضم

أو حتى اهتم

بصراخ الطفل اللي اتربى

من غير الأم

إرمي أحزانك ف اليم

واهتم

ببلدنا اللي بتحمي ولادنا

فبلدنا .. يا حبيبي أهم

*********************

رضا ابو الغيط