قصيدة : إضحك يافقير .مسابقة الشعر العامى بقلم / عادل عبد الغنى عبد الحميد

اضحك يا فقير

لك رب كبير

حاكم للدنيا بملكوته

بيراضي الخلق ف كل مصير

بيهد الظلم بجبروته

وينادى عبادي الرحمه كتير

ولا عايز واسطه ولا اونطه

محتاج ترجع مخلص للخير

وتطبطب علي كتف يتيمه

تحضنها بفرحه ترد الروح

مش كدبة باشاوات في وليمه

بيذل اللقمه عشان بحبوح

شكرا لعظمتك محفظتك

بتزيد دايما رغم المصاريف

و البركة يا دوب لقطة صورة

بتاخدها عدسات في كامراتك

ندعيلك بالسلطة جلالتك

واحنا الوكسه بتعض رغيف

شكرا ممنون ليك و لخالتك

هنعيش بالحلم علي الطراطيف

انا مش ثائر ولا واد خلبوص

ولا حلمي تكية وبحر فلوس

ولا سلطة بجزمه تعدي تدوس

قلب غلابه بسحابة صيف

انا شايل قلبي واحلامي

ومسيح الحق في اسلامي

والشمس بتضحك لكلامي

وتقول مجنون وغريب وظريف

مش املي اروح الشانزليه

ولا ابويا اشوفه سعادة البيه

نا حلمي يا دوب فردة مركوب

امشي براحتي حلو سلانسيه

موش عاوز منكم مصالحكم

ولا حتة تورته في افراحكم

ان دمع قفايا في ملامحكم

ارجع وايدين الدنيا عليه