قصيدة: اجازة عارضة .. مسابقة الشعر العامي ..بقلم / رباب حسن حسن على

..

للمشارك في فرع العامية

الاسم / رباب حسن حسن على
الشهرة/ رباب الجورية
البلد / مصر

رابط الصفحة ع الفيس بوك
https://www.facebook.com/profile.php?id=100047394407878&mibextid=ZbWKwL

اجازة عارضة.
على باب عينيك
واقفة وشايلة من الرجا
مليون جرام وجبال أمل
وفي إيدي باقة من الحنين
واقفة وحانية ضهرها
تضرب فى جرس الأمنيات
إنك هتفتح ليها باب ولحلمها
وتشوف عينيك

واقفة بتترجى الأوكر
حبة حنين
ترحم عذاب الحيرانين
وتمد إيدها بين ضلوع المشتاقين
تسرق شوية من اللقا
وتوصله لحدود هواك
فتحس بيها الأوردة اللي في ضلوعك عطشانين
لكاسين غرام من جوة قلبي يشدها

على باب عينيك
واقفة وبشحت لقمة من عيش اللقا
شحاتة بتسول رضا
الجرح جوة القلب عفّن م الجفا
وضمادة الحب في ايديك
رُش في مضادات البعاد
إدهن كريم الاشتياق
والضم بـ إبرة لهفتي مع خيط أنين من دمعتي
خيّط حدودنا باللقا
خليني أرجع واتولد تاني في عينيك

رغم البيبان اللي مقسّيها الزمان
قافلة ما بينا فجر يطلع من طابور الذكريات المؤلمة
قاطمة فى وسط كل لهفة تشوف عينيك تعلن بيان جوة شاشات عرض الفراق انه خلاص مستسلمة
رفعت راياتها بلون بياض
لاجل اما يطلع النهار وتبان عينيك مع ضي شمس الصبح جاية تبتسم
فيهب ليل السهرانين يفرد ملايته على الطريق
ويلم فيها كل دمعة وكل آهة من حلوق المجروحين يعملها سرة يشدها على ضهره ويقدم طلب أجازة عارضة للألم
وإن إتسأل إيه السبب
يوصف عينيك

مجنونة انا
ساندة بعكاز الغرام
داخلة فــــــ اساطير الهوى
وبـاشوفني ويّاك سندريلا
وباشوفني بردو الساحرة
ماسكة عصاية الأمنيات
ولبست فستان م الحنين
وانت الأمير اللي في يوم
راح ييجي بحذائها الزجاج
دايس على
كل نداءات الغرام
اللي في عيون كل البنات
داقق طبول الفرْح ومنزّل خبر
كل عقارب الساعات راح تتوقف وما تمشي بعد الثانية عشر
وخلاص راح تتقفل كل بيبان
تسمح لها بلحظة هروب
وإن الفتاة المعلنة
تبقى أميرة فى قلعتك
هي انا
والبس في تاج الحب جنبك
فينادي قلبي ما بين ضلوعي
وتدق أجراس الحنين
المزروعين جوة بساتين الخدود
يطرح وروده الحمرا فيا
يعلن كسوفي ما بين عينيك
تعلن عينيك فرض الولاء
وابصم أنا على كل إقرار للطاعات
فرض الوفاء 👈🏻👈🏻👈🏻جوة فى عينيك