قصيدة: اطمني . مسابقة الشعر العامي بقلم / محمد الطنطاوي

رقم الهاتف/٠١٠٦٦٧٣٢١٨٥

قصيدة عامية بعنوان اطمني

اطمني

ما انا قلتلك من قبل حتى ما تسألي

لو كنت ناوية على الرحيل

يلا ارحلي

واطمني

مش ها تعبك بالأسئلة

وازاي …وليه

ولا راح اقول ان البعاد

صعب اني يوم اقدر عليه

فبلاش تلومي على الزمن

وبلاش تصبي في الكفن دمع الملام

طرح الغرام ما بيتجنيش الا بغرام

مش فين وليه ولا كم بكم

مابيتعرفش العشق غير وقت الخصام

وقت الفراق كل الكلام بيكون حزين

بيكون سيوف تدبح قلوب العاشقين

وبقيت مناش قد الهوى

ولا قد أوجاع السنين

ولا قد أحكام الحنين اللي ف غرامك هدني

قلبي اللي كان للريح تملي بينحني

دلوقت واقف ع الحياد

ما بقيتش قادر اضحي بيه

ولا اسيبه يبقى فريسة للوم والعناد

مابقيتش أخاف م البعد لو كان الوصال هيذلني

ولا عدت اخاف لو هتسيبيني وترحلي

فاطمني…

اطمني