اعتراف
*******
لحظة ما قلبى قال لها
إنه هواها وحبها
حسيت بروحى بتنسحب
وبتترمى فى حُضنها
حسيت بقلبى اللى ارتوى
من نبع أسرار الهوى
طاير يحلق ف السما
ويمد أيده للقمر
بورود بتشبه خدها
حسيت بعينى اللى ابتدت
تطرح فرح
فوق خد م الدمع الحزين ياما انجرح
بتروح لها وتقول لها
م الليله هبدأ رحلتى
داخل حدود نن العيون المغرمه
تسمع كلام
ما قلتوش من كام سنه
م الليله هسمع ضحكتك
وأملا كاساتى اللى اشتهت
طعم الشفايف بالأمل
وانسى الغضب وانسى الزعل
واعيش سنينى اللى ابتدت
تسمع رنين صوت القلوب المشتاقين
الحب يسعد نبضها
حسيت بشيئ
م الصعب جدا أوصفه
ف الكراسات
أو حتى ف ديوانى الوحيد
اللى بيحمل اسمها
أصل اللى بينى وبين حبيتى الملهمه
مش قاعدة ممكن تنتهى ويا الكلام
ولا سكة ضلمة بتشتهى طعم الألام
ولا صوت مواجع جوه حلم يخضها
د أنا اللى بينى وبين حبيبتى الملهمة
حب وغرام
وآيات سلام
وكلام مابين قلبى المتيم بالهوى
وعيون ما شفتش زيها
**************************
رضا أبو الغيط
