قصيدة : اعتراف . مسابقة الشعر العامي بقلم / محمود عبدالظاهر البكري

اعتراف
********

واللي لونّ لك عيونك بلون حياتي في بُعدي عنكْ
واللي سن لِك رموشك بالخناجر اتجاهي في قربي منكْ
قلبي دا باصم بإنكْ
ست كل الكون بحاله … وانه يتجنن وماله
بس بُعد الشر عنكْ
مالّلي داق الشوق حَدانا
يعرف القصة معانا إننا في العشق أوفى
واننا بنصون وعودنا
مهما كان … حافظين عهودنا
نقص كِيل العشق يُوفى
ويوم نثور…. لحظة نسامح
سمرة تفاصيل الملامح
م الحليب قلوبنا أصفى
طبل بلدي قلوبنا ترجف ع اللي ساكن بين ضلوعنا نفس خط القلب واحد
إحنا نرضى بأي حاجة في شوق ودادكم إلا إن القلب فينا يبقى جاحد
إحنا نسكر م الكلام الحلو خمرة
بابتسامة سِك نطرب ليل طويل والمزة جمرة
إحنا تهوانا الكواكب واللي ماشي واللي راكب
بس كيفنا في الغرام الجَد قمرة
طبعنا طبع الفوارس واللي غارس فينا زرعه… هو عارف مستحيل هنخوض حروبنا لو مفيش للسرج مُهرة
فوق نخيل العِزة نُسكن
والبيوت طوبها الكرامة
هزل جد وجَد جد وألف جِدي للأصول طبع وصرامة
عشق إيه من غير كرامة ؟!
عشق إيه فـ لحظة يخلص لو نغيب ولو نسيب الكون يُمر زي تسديد الغرامة ؟!!
إحنا غيركم… ياللي بتجيبوا فـ آخركم
وانتوا لينا يادوب بداية
إنتوا تفاصيلكم مظاهر.. واللي ظاهر نار بتلفح والرماد ولد النهاية
تبتدي بإيه الحكاية ..تنتهي بإيه الحكاية مش مهم أبداّ معايا
الغرام في الأصل آية
والوفا شمسي وهوايا
لحظة فيها الكون دا ملكي لما بتكوني معايا
هما راحوا وانتي جايا
وانتي حلم اللي بيحلم وانتي أغلى من اللقايا
قولي إيه حل فـ هوايا ؟!
ياللي قايدة العمر شمعة تحرقيه بس لرضايا
نفسي نعرف يعني كيف البحر يهدى لما اجيب له بس سيرتك والشطوط تسمع حَكايا ؟!
يعني إيه الرمل يدبل لو يشوف مرّة بُكايا ؟!
يعني إيه الشمس تغفل أو تنام بس في سمايا ؟!
كل نجمة غايرة منك
ع الدوام تُتُرك مدارها ..فايته دارها لجل ما تسهر حَدايا ؟!
نفسها لو مرّة واعشق
حلمها لو قلبي يشفق
والسراب أخرة لُقايا
( قولي إيه حلو في حياتي وانتي غايبة عن عنيا ؟ )
آه مفيش… والكمال مش بيكي ينقص
والكلام في عنيكِ يخلص
ولسه موصلتش منايا

************

محمود عبدالظاهر البكري

( محمود عبدالله محمد عبدالظاهر والشهرة … محمود عبدالظاهر البكري)