.مهرجان همسه الدولي للفنون والآداب
نوع القصيده شعر عامي
الإسم عبد الفتاح احمد الغنيمي
البلد مصر
رقم الموبايل 01110887805
…. البداية …..
القصة بدأت لما
كُنا صُغيرين
كات فيه قلوب
بتعَلِمك أخلاق ودين
وتعلِمك وسط الطوفان
إنك تكون صادق أمين
وازاي تعامل الناس
بذوق وأدب ولين
وتعلِمك ازاي
يكون الإحترام
وإن الشرف بيْعَلِي
دايماً في المقام
والحق مش ممكن
نساوم يوم عليه
ولو التمن كان عُمرنا
نبيع حياتنا ونشتريه
وعلمونا الصدق دايماً
في العمل وفي الكلام
وعلمونا إن الحلال
عَمّرْ بيوت
وبيوت كتير خِربت
عشان أكلت حرام
أنا أبويا كان فلاح بسيط
مارحش يوم المدرسة
وأمي لا عرفت جبر
يوم ولا هندسة
ولا يوم قروا كُتب
العلوم والفلسفة
لكن قلوبهم كات
ملانه بالإيمان
الفجر يطلع
من وشوشهم
تلقي نور
يملي المكان
أنا أبويا كانت سجدته
في الضلمة نور
كان لما يدعي ربنا
تلقي الأمان حوليه يدور
كان لما يذكر ربنا
تلقي النجوم
وياه حضور
وكانت أمي الطيبة
فجر وشروق
الشمس تطلع
من عنيها
تملي كل الكون
هدوء
فعلمونا ازاي نكون ..
وازاي نصون العقل ..
في زمن الجنون
ودا كان سلوك
مش كلمة تتقال
والسلام
واللي يعلِم بالعمل
غير اللي علِم بالكلام
……………………………
عبد الفتاح أحمد الغنيمي
الدوله مصر
قصيده من الشعر العامي
