البواقى
وقْعت عقارب ساعتي مـ الخَضّة
بعد امّا قالوا المحبوسين
نَطّوا الجدار
مدْريتش خالص غير وانا..
كـ القابضين لـ جمرةٍ من نار
واقف بِنِقْرا الفاتحة على روح الشباب
وفمُخي آلة جَرد لـ صحابي
آدي اللي باقي بيترمي جمب اللي غاب
آدي اللي ساب فـ عنيّا دمعة
تروي من فوقه التراب
هل كل دول عدّوا اختبار وانا لسه فاضل؟
طب إيه يارب..
عرّفني فاضل قد إيه..
ولّا بقيت آخر مُناضل؟
مين فتح شبابيك أُوَضْنا على الجحيم؟
وجّه عنينا على المواجع
عضم الغلابة بيتهرَس
مع كل جزمة تدوس فـ جامع
مع كل شال معمول بـ جلد من الأسير
دا انا من يومين بمسك حرامي
شاوروا وقالوا امسِك ضمير
إيه الحكاية؟
كسروا المرايا عشان وجوه الشرّ مِسْوِدّة
عشان محدش يعرف انّه بخير
خَلطَوا التاريخ..
مبقتش قادر اميّز الناس مـ الوشوش
بُصّ فـ عيون الشابّ منّا هتلقى أصله
إبن كومة هَمّ دايساها العروش
حوش مدرستنا..
حوش لـ تُجّار السلاح
ضربوا الشباب فـ عقولها جامد ثم قالوا:
يلّا حيَّ على الكفاح
طب إيه يارب..
عرّفني فاضل قد إيه..
ولّا بقيت آخر صلاح؟
آخر رسالة ميقراهاش غير حد صالح
فـ اتمنّى تسمعني
إيّاك فـ يوم
تِسمح لـ صوت الدنيا يندهلك
إسمعني انا شبهك..وطنك..
وآخر نسل من آدم
لو مُت فجأة وشتموا فيّا..
رُدّ غيبتي
لو شَكَروا فيّا اشطُبني من بني آدم
هَوْصيك بـ حاجة أخيرة من بعدي
علشان بخاف لـ احْسن أموت
شاهد على سوء الأمور
بالله عليك..
لو مُت عيني مفتّحة
غمّيلي عيني وقولي لسه الدنيا نور
وادفنلي جسمي بعيد عن الباقي
إحميني من نَبش القبور
وتعالى زورني متنسانيش
الوحدة أخدت حقها فـ سيري
آخر رسالة ميقراهاش غير حد صالح
آخر رسالة ميقراهاش غيري
