قصيدة الحارة . مسابقة الشعر العامى بقلم / أشرف عبده على البنا

أشرف عبده على البنا
الشهرة : أشرف البنا
الدولة : مصر _ القاهرة
تليفون : ٠١٠٠٦٥٠٣٣٤٠
واتس : ٠١٢٢٦٤٩٤٣٤٧
فرع قصيدة العامية
نص بعنوان ( الحارة )
…………………………….
( الحارة )

الحارة كانت بكر
بريئة بنت الإيه
قلبي اللي ضاع بإيديه
كانت أميرة عليه
أيام ماكنت حبيب
فرحان وبيغني
صوتها يدندن وتر
لو حسي ضاع مني
يطوف ديار وحارات
يغلب سؤال عني
يبعت خياله نعيم
وبصدره يحضنني
حضن العفاف والخوف
وضمة الخجلان
نظراته روح قنديل
مالمحش عينها شيطان
وكان حدايا صوت
ممكن يقف للموت
وبلحنها المغزول
يسعد عتب وبيوت
جارنا الآلاتي غمز
واللحن كان سواريه
بكمنجة بياتي
رقصت عيونها عليه
*****
هو أنت كنت إزاي
الدنيا والأحلام
كنانة جوة الروح
والقلب ليك سهام
أنا كنت ليك الجدع
اللي أتولد شاري
قلبي ف هواك اعتل
واتهد مشواري
رتل أغاني البوح
وقالك أختاري
غواك لحن غريب
كان ديب ومتداري
تلعب عليه العلل
ويزيد لهيب ناري
دبلت عيونك قهر
وعهر من جوفك
لمسة كفوف البكر
مش باينة ف كفوفك
شفتك جريت م الخوف
وأنا كنت ملهوفك
يام الخطاوي سبيل
داري العيون م الشوف
لمعة عيونها دليل
يفضح جبين مكشوف
ينكر ضل الرموش
وعيون تنطق سكات
إيش جاب كذب الوشوش
لعيون ست الحارات
#أشرف_البنا