رضا ابو شنب قصيدتي (الحضانة) اتولدنا في الحضانه وانكتبنا جوه خانه قالو لسه الواد صغير حطوا قدامه العلامه وابعدوه عن صدر امه رضعوه من الاجزاخانه وارسموا جواها طريقنا قبل ما يحس بندامة لما يجي و يفارقنا يبقي يمشي بالسلامه حفظوني في الحروف قعدوا يملوا القلب خوف خوفوني من الكلام و الضمير خلوه ينام اوعي يطلعلك لسان عيش حياتك فيلسوف لو تعيش خليك جبان بالعجين سد الودان و بعنيك اياك تشوف هنعيشك عيشة تمام ونزغطك زي الحمام وان يوم كبرت نقصصك ونطيرك حسب الظروف طول ما انت طالب ودنا هندلعك من غير كسوف ونلبسك احسن قماش والبدلة تبقي خيوطها صوف وان يوم شيطانك يخدعك يضحك عليك و يوقعك هنربطك زي الخروف ********************** جنب مني في الحضانه ناس ..........كتير اللي ياكل بالقديمة واللي يحلم بالفطير واللي عايش بس ميت واللي بيحاول يطير واللي عامل نفسه عمدة يمشي جنبه كام غفير يحرسوها من ايدينا يحرمونا من الشعير ياكلوا منا وياكلوا فينا يحبسونا جوه بير لما حاولوا يعلمونا ركبونا علي الحمير والحصان حتة حلاوة والعروسة للأمير لو شافوا الدم فينا وزعوه زي العصير ***************** الحضانة زي غابة يقتلوا فيها الفقير يعدموا فيها الغلابه والديابة تعيش كتير علمونا كل حاجه زرعو جوانا البلاده خلو لينا العيشة سادة والعويل خلوه مدير علمونا الكفر بيكي قطعو بايدهم ايديكي منعوا فيكي اي خير حفظونا وعلمونا نيمونا علي الحصير رغم كل الضرب فينا نسيوا يومها يعلمونا يبقي جوانا الضمير يبقي جوانا الضمير
