الديك لو باض …
***********
وانت معاك
قوم بص وشوف
كام واحد قال بيفكر فيك
ومناه يهديك
ف الليل قنديل
ويشيلك شيل
ويقول لجنابك ولمعاليك
شوبيك لبيك
أنا ملك ايديك وكمان رجليك
اعملني مداس وكمان ملاس
وأرميني ف بحر الخوف ماتخاف
ان كان يرضيك
طول ما انت معاك
انا روحي فداك
وهواك ف القلب مالهش مثيل
ولا حتي شريك
وعشان تتأكد م الموضوع
قوم مثل دور غلبان بيموت
من طعن الجوع
واربط منديل على طرف عينيك
واتحنى بليل مش سائل فيك
واطلب م الناس ف أوقات الضيق
لو حتى رغيف
يخرس أصوات عصافير البطن
ف عز الليل
ويزيح من فوق الكتف جبال
م الخوف والويل
يمكن تديك
من غير ما تذلك أو تأذيك
وتطلع ام حبابي عينيك
وتضحك طوب الأرض عليك
وتبيع معاليك
ف أقربها مزاد
صدقني ياواد
الديك لو باض
هتلاقي قلوب ف زمان مقلوب
راح تشعر بيك
***********************”
