ماتوصي الشعر عليا بجد
دا خاصمني من وقت ماغبتي
وقوليله انك راضية عليا
وقوليله انك لسه حبيبتي
.
خليه يطمن على حالنا
وقوليله انك ضي العين
الشعر بيعند ويايا
لو شك اننا متباعدين
.
أنا إيه ف الشعر بدون رمشك
كل الأحاسيس فيا بليده
إتوسطي عنده و ساعديني
محتاج أكتب حاجه جديدة
دنا قلبي ان حس إنك جنبه
دقاته تقول .. ألف قصيده
.
ربنا ياحبيبتي يديم روحك
ويديمك إلهامي و ضللي
و الله بدون أي مبالغه
وبقولها و هقولها تمللي
حبيت الشعر أوي عشانك
علشان يشبهلك بالمللي
.
دنا قلمي ان ماكتبش يوماتي
علشانك فا مصيره القبر
أحاسيسي خلاص مابتصبرشي
ومفيش إحساس يرضيه صبر
والشعر بدونك يا حبيبتي
يشبه للكيميا و للجبر
.
فا أمانه توصي الشعر كتير
يفضل مصاحبني ولايسيبنيش
وانا وعد ازرعه فعيون الشوق
وقلوب العشاق و الدراويش
وان كنت بحب أعيش الشعر
فا انا أصلا بيكي وليكي بعيش
.
وقوليله مفيش أبدا كلمه
في قصايدي الا وكانت ليكي
واعرفي حاجه واحده هقولهالك
حطيها ف بالك .. و عنيكي
إن الاحساس بيغير مني
و الشعر بيحسدني عليكي
.
.
.
