قصيدة (الصورة) مسابقة الشعر العامى بقلم / علاء محمد أبو ذكرى

مشاركة في الشعر العامي للمسابقة
الاسم علاء محمد أبوذكري
مصري اعمل في الخارج
ت 0508361463

((الصـــوره)
—————

منحوتة صورة فوق جدار الخوف
بتحب تحكي وهي خايفة تشوف
ذي الألوف المعدودين بالإسم
الرسم غير الرسم ..
متشكله بعنوان
نفس الملامح مرسومين ع الحيط
والدم ناشف في العروق فدادين
ضل الإيدين مرفوعه للإحسان
متشبكه مع سلسلة سجان
والعندليب في الصورة ملهوش صوت
والشمس غابت والهلال بيفوت
وصبية تصرخ .. بس صرخة موت
نفس الألوف المعدودين بالإسم
تحت الجدار متبعترين ع الرسم
نفس الرتوش متلونة بعناقيد
والحلم صورة جوا ليلة عيد
قلمي الرصاص مضروب بخلطة زيت
يرسم معاني وهي عنه بعيد
صوت النفير ف الصورة صحًى الناي
وجع الانين المر رايح جاي
جوا الضلام مخنوقة لمحة ضي
والقلب ساكن جوا نبضه الحي
وصبية تغزل نبتها بإيدها
تروي عيدان القمح بوريدها
ريحة العجين منقوع ومتخمر
مستني نار الفرن والخباز
لسة الحطب ساقع من الضلة
لسه الوشوش الممسوحين طله
فوق مصطبة جدي هنشرب شاي
مهما الزمان المر رايح جاي
هبدور تقاوي فوق حصاوي الدار
وارسم أغاني منحوتين ف جدار
ونسج ف ليلي ظل بعده نهــار
في الصورة دره في كتير أسرار
للفرح شوقه للحنين إعصـــار
نفس السؤال مطروح ومتحير
لو يوم يموت القلب يتغير
ممكن يعيش النبض جوا جـــدار
==================

علاء أبوذكري