قصيدة : العهدة على الراوي .. مسابقة الشعر العامي بقلم / محمد محمود علي

محمد محمود علي
جمهورية مصر العربية
محافظة القاهرة
رقم الإتصال / الواتس 01113163575
https://www.facebook.com/profile.php?id=100010595432162&mibextid=ZbWKwL
فرع شعر العامية المصرية

قصيدة ” العهدة على الراوي”

و العهدة على الراوي
إنو مهما كترت الخطاوي
على الطريق آخره وصول
و إنو اللي واخد من الصبر زاده
هيجي يوم و ينول
ما أهو كل شي في الحياة بميعاده
فآمن بحكمة ربك
مهما جلت على العقول
إوعا تجزع لو تدوق المر
إصبر و بلاش تكون إنسان عجول
ربك وقت الفرج يفتح لك الأبواب
و إنت من قلة حيلتك
كنت بتبكي على باب مقفول
فأملأ قلبك رضا و قبول
و بلاش حزنك على حاجة يطول
تبات نار تصبح رماد
و اللي إمبارح كان مرفوض
بكرة يصبح مقبول
فإمسك في الحلم و جمد
و خليك في الدنيا محارب
متخافش تفشل دي تجارب
حارب على الحلم و عافر
سيبك من اليأس ده كافر
الكل في الدنيا مسافر
واللي بيلتفت مبيوصلش
و اللي بيتعب في نص الرحلة
و اللي بيتوه عن السكة
ضيع نفسه و ملوش حجة
طول ما فيك نفس فيك أمل
و طالما لسا الشمس بتطلع
فكل شئ محتمل
بين الحياة و الموت
القصة مكتوبة
و كلنا رايحين نفس الوجهة
و الخطوة محسوبة
و في النهاية إحنا بشر
ميزتنا في الذنب و التوبة
فبلاش تكون موهوم
و تشوف الصورة مقلوبة
جينا الدنيا لحكمة
و الرزق كان مقسوم
لا الحزن فيها بيطول
و لا الفرح بيدوم
اللي نصيبك مستنيك
لو تحت سابع أرض يجيك
ربك خلقك وعالم بحالك
و لا عمره في يوم نسيك
إرضا بس بحالك
و أطلب رزقك بحلالك
لو كان بسيط يحلالك
و ربك بكرمه هيرضيك