من نُص الليل
النار بتعُض إيديه من جوع الفُرن
وتسيّل عرق الصهد في وشُُه لحد جِدور الارض
وقتها ..
كان عمي محمد واقف يحيي العرض
ويقلِّب روحُه في طِشت عجين ويرُص صاجات
والناحية التانية إتنين عُمال بيلموا العيش خمسات، خمسات
والناس بتزيد
عُمال الفُرن عشان مساكين !
قاموا عملوا ما بينهم صرح حديد
أما احنا عشان الصبر قَلِيل
بنسِّب الناس ونقول العيشه مرار
بينما فيه هناك.. انسان بيسوّي العيش وإيديه في النار
بينما فيه هناك.. انسان بيخاف ربنا في العد
بينما فيه هناك .. الناس بتزيد والعيش عالقد
وزعيق وصريخ
وابتدوا في الضرب
عُمال الفُُرن إنسحبوا عشان
ما تقومش الحرب
وانا صاحبي عشان الدَيْن شقّاه
خَد ساتر في العجانه وكمّل شُغلُه تمام
دا لأنه تملي يقول..
اللُقمة اللي ما تأويش إنسان بتشبّع فرد حمام
والقِرش اللي ما بيجيش بالصعب كأنُه ما جاش
في الناحية التانية ..
الدم كتير
والعيش بيلف وريدُه بـِـ شاش
والناس بتزيد وتزيد
الصرح إتزال وكأنُه ما كانش حديد
والخلق إحتلوا الفُرن وعدموا العيش.. مَا كلوش
السير ما لقاش في السِّكة عجين
ما لقاش غير صاحبي
قام كلبِش فيه ما سابوش
من يومها..
وانا قلبي فيه نُص رغيف مِتشال
من يومها ..
لا باروح إفران
ولا حتي باشوف العيش عند البقال
وانا صاحبي عشان الدَيْن شقّاه
إستخسروا فيه شنطة نضيفة
فَـ اتباع في شِوال.
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
