القول فصيح.. لكن شكل الموت صحيح عامل فواصل ف الجمل قصدى أن أقول.. عمل فواصل فى الحياة الكل تاه .. فيه دربكة .. يلعن سنين الفذلكة شيء مش جديد لسانك عنيد.. خليك عنيد مادام يهم اللى عليه القلب راسم سكته مليانة شوك... ويفيد بإيه .. مادمنا فى زمن الشكوك ما يهم قلبك.. لو قالوا له العند واحد من دروب الانتحار ويفيد بإيه لو آخر سوك .. طب ما أنت ميت من زمان والوقت فرصة أنك تصيح تكشف الزيف م الصحيح يلا صيح ... خليك بلال.. وارمى التكال.. ما هو كل فجر وله أدان والحكمة يحكمها الزمان دور وشوف.. ودوس بقلبك على المحن صوتك وهن..؟ ولا السكات اللي في شوارع دنيتك خلاك تلين.. وتعيش حزين.. جدد ف قولك كلمتين واضح بعزم الصدق عندك ..خطوتين قول ما جرى.. ما تخافش قول .. في أول الصفحة سطور وطبيعى جدًّا .. إنه يبقى الصوت حزين وما بين تقاسيم الزمن فوق وشك المرسوم عليه ..سكة سفر مكتوب عليها ما بين قوسين "الاغتراب" القلب قواه العذاب.. يحلف هاب.. ولا يوم يفكر ينحنى أو ينتنى.. أو يختفى .. حتى بظهور كل الخفافيش اللى يحميها الضلام وعشان كده... أنا قلت فى الصدق الملاذ أنا قلت فى القلب عاذ قولى الفصيح .. لأجلن يصيح .. ويعيش صحيح..
