اسم القصيدة / اللى كانت يوم مراتى
الشاعرة / أميرة المحمدى
البلد / مصر – محافظة الدقهلية – مدينة بنى عبيد
رابط الفيسبوك /
https://www.facebook.com/amira.almohmady.1?mibextid=ZbWKwL
كلمات القصيدة …
هم سارح ع الكتاف
بعد فرحة يوم زفاف
عيشة صعبة كل يوم
حتى لو تعبان تقوم
اللى سابك وسط نار
حول الحب لدمار
فكروا الست الضعيفة
ترضى بالعيشة المخيفة
نسيوا إن الست روح
ترفض العشق بجروح
هى قلب ف توب كرامة
مش هاتقبل بالإهانة
مش هاتقبل تبقى لعبة
لأ دى ست الناس وصعبة
دا الجواز عزة وسلامة
ليه هاتقتل الابتسامة !
راجل انت ولما تبعد
كل غلطة إحلف وهدد !!
بالطلاق وقت المشاكل
دانت زودت المسائل
فجوة توسع ف الخلاف
لأجل حظك مش بخاف
سهل يعنى لو هتبعد
قوللى إمتى قدرت تسند ؟
إمتى قلبك حن ليا
عشت تقسى سنين عليا
كنت راجل برة بيتك
دنجوان مشهور بصيتك
كنت بفرح يوم فى شهرى
لما ترجع ليلة بدرى
وأما أواجهك كنت تزعل
تتهمنى كأنى مشكل
مش مراتك مش حبيبة !!!
مش حلالك !! هو عيبه !!!
يعنى تبقى الحلو كله
أما قلبى تعيش تذله ؟
لا وربك ما ارضىٰ بيها
عيشة صعب ان أشتريها
أيوة هارفض إنى أرجع
مش هعيش إحساس بيوجع
قلبى له حق احترامُه
مش هاسلملك حطامُه
مش هعيش عيشتك ياغالى
مش هكون حد انفعالى
انت صعب تكون أمانى
انت قلبك مش مكانى
رايحه أرجع عُمر فاتنى
من غبائى إنهار و سابنى
لأجل ماعرف فرق عيشة
بين حرير أبيض وخيشة
دا اللى يستقوىٰ بكلامه
ماتلاقيش أفعال مقامه
خارجه من دنيا المآسى
حتى كونك مش مقاسى
ذكرى تتعب كل عاشق
قلب باعك يوم وفارق
مانت أصلك حب غادر
قلب مصنوع مِ المحاجر
قوللى هاندم ليه وأعاتب ؟
النصيب مكتوب وغالب
بُكرة قلبك يفتكرنى
كانت الحب اللى زارنى
كام سنه ف مشوار حياتى
اللى كانت يوم مِراتى
