(الليل قابيل )
الليل عَازمنِي ف مَشرَحه
والأكل جسمي اللي اتهَلَك
الليل مَدار فاق الفَلَك
جُواه يدور فِكر الوَجع
واليأس وَحدُه اللي امتَلَك
معرفش ليه قلبي ارتَبَك؟!
الليل ألَم بيغُز صِدري ويدبَحه
بيشَتِت العقل اللي فيا ويمسحه
ويمد إيده لباب جُهنم يفتحه
ف ألقاني وسط المَلحمه
السيف عِجز يحمِي الجسد
ف لقيتني جوا المَفرمه
الليل قَابيل
قاتل هَابيل
والدَم دَمِّي في مَسرَحُه
الليل زمن بيفوت بَطئ
بِيعرِّى قلبي ويفضَحه
الليل بيضحك مَطرحُه
ويبص ناحية غُرفتي
ويجر قَطره ويركِنه
هو وجِراحه في سِكتي
الليل عَفن وسط الغُموس
إن دُوقته بَتسمِّم قَوام
الليل بيشبه للكابوس
وأصعب كتير من لما أنام
وأحلم بموت
الليل سُكوت
مَخلوط بِ رَعد
بيهز جسمي اللي إتحَني
الليل ده بَرد
ساقع فؤاده وضَمِّني
صَابني بِ بُرود
الليل ده ظالم هَدِّني
خَالف وعود
كل الزمن
الليل صَبح لا يُؤتمن
الليل وُرود
من شوك بينبِت كل يوم
الليل هُموم
بتصِيدني من أبعد مكان
وتسِيبني بتمنّي الأمان
وأطلب كمان
لو بس ثانيه يعدِّي نوم
الليل ده بَحر ومُوجه سِكينه
وف كل خطوه بس تجرَحنِي
لو قولت أهرب منه وأتعافي
بلقاني غُصت في ناره تحرقني
الليل قمر مُعتِم قوووووي
ناشر ظلامه في مُهجِتي
الليل ده سُوس فَضَّى الفؤاد
سَلسِل أماني وغَلِّتي
الليل دا دَائى وعلِّتي
خَالي الدَوا
الليل ب يُنشُر كَسرتُه
ويّا الهوا
الليل ده أضيق مِ النَوي
عَ العقل بس
الليل ده أوسع مِ الفَضَا
والدمع حِس
صوته يهز الأمكنة
قادر يخلي الحَسره سَهله وممكِنه
ويصيب فؤادى بِ تَربَنه
الليل هِنا سالب هَنا
مفروشه أرضه بغربتَك
الليل ده كافر تِندهَك
من وسط أَمنَك سكِتُه
فتوّهَك وتكفّرَك
يمسك شاكوشه يكسّرَك
يسرق حياتك يقتِلَك
ويدمّرَك
الليل سِهامه بتجرحَك
ويصُب دَمَّك يشرَبُه
الليل سَراب بيضيّعَك
الليل ده عَلقَم طعمه مُر
لو هختصر كل اللي فات
الليل حساب كل اللي مَر
——————
امنيه وليد سعيد عبدالهادي
