قصيدة : الوصية . مسابقة الشعر العامى بقلم / رضا أبو شنب

الاسم رضا علي احمد ابو شنب

المنصورة/ ميت غمر

رقم الواتس ٠١٢٨٢٣١٠٠٩١

صفحة الفيس

https://www.facebook.com/profile.php?id=100015259773325

خاصة بمسابقة همسة

مسابقة الشعر العامي

(الوصية)

كنت قاعد جنب ابويا

جنب بيتنا وعلي القنايه

قالي يا بني نفسي اقولك

كام وصيه وكااااام حكاية

اوعي ياابني تحب ضلك

لما تلبس في العبايه

او شيطانك يوم يضلك

او تكتر في الدعايه

لو لسانك يوم يذلك

افتكرني وعيش معايا

اللي عايز يبقي خلك

يبقي خلك للنهايه

واللي بيفكر يضمك

تبقي مش قصة وروايه

ربنا وصاك بامك

في الكتاب وصاك بايه

هي روحك قبل دمك

هي اولي بالرعاية

اللي دايما شايله همك

من البدايه للنهاية

هي قبل ابوك وعمك

لما تتمني الهدايه

من زمان وانا قلبي حبك

كنت حلمي من البدايه

كنت زيك كنت قدك

كنت بلعب بالعصايه

كنت بفرح لما اعاندك

لما تداري في قفايا

كنت بعمل نفسي ضدك

وانت بتقفل معايا

كنت بجري واقول بحبك

كنت بجري واقول ضنايا

خلي صورتي جوه قلبك

ياللي حبك مش كفايا

وادعي ليا عند ربك

وافتكرني في كل ايه

قول يارب الكون ده عبدك

كان يحبك كان ورايا

هو علمني اني احبك

هو علمني الرماية

لما يبقي ابويا عندك

ارحمه وارحم قسايا

حب بلدك لو تذلك

حب بلدك للنهايه

زي ما بتحب في امك

مهما تمسكلك عصايه

قلبها لو يوم يضمك

قلبها زي المرايا

هي قاعدة جوه قلبك

وانت قاعد من البدايه

الوصية ياابني عندك

احكي عنها للصبايا

احكي عني وخلي قلبك

يدعي ليا بالهدايه

احكي عني وخلي قلبك

يدعي ليا بالهدايه