…….انا ما زلت وحداني …….
مفيش كلمه تواسي الجرح
وتلمه لانو غويط
جزوره نبته من قلبي
وجرح القلب من جوه ملوش
تظبيط
وقلبي اللي انكسر مره
لا يستحمل ولا يقدر علي التخبيط
لان ايمانه في الواقع
ايمان الطيب العاقل
ولا عمره ما كنش عبيط
بلاش الثرثره والزيف
وتطعن من عشق قلبك
بعشق شريف
بعشق عفيف
شاريتو من بلاد بره بقرش نضيف
لا هو من باله في العتبه
ولا صيني
ولا هندي برخص تراب مدينة كيف
انا حريف
بحب البيعه لو تغلا
ولو غالي علي قلبي
فلازم حتما استغلا
وأشوف الماركه والتوصيف
لا غالي يغلي علي حبك
ولا حبك علي يهون
وفاكر كل تفاصيلك
واخر ضحكه في التلفون
واخر رنه كات امته
واخر نبره صوتها حنون
انا في عشقك شهيد مجنون
ومستني بقالي سنين
يا آخر فرحة في العشرين
واخر لمحه ليها تاريخ
تاريخها لو رجعنا زمان
تلاقي الحكم كان لي امون
انا مش عارف التوقيت
ولا الثانيه ولا الساعه
ولا بحفظشي بالتواريخ ولا الالوان
وقلبي اللي عشق قلبك
قفل بابه بقالو زمان
انا فاكر ساعتها كمان
قامت ثوره في بلاد الشام
وليبيا ومصر كان فيها
شعار الاخوه والاخوان
وشقو الثوره واتقاسمو
كراسي ومنظره وميدان
ومن يومها معدش اذان
انا معاصر تاريخ الحب احكيلك
يا سمره مدي منديلك
وانا اديلك هدايا كنتي جايباها بتتسلي
كومين اللب والترمس
ولسه القعده واخدانا
وصوتك وانتي شرقانه
ساعتها وانتي بتحلي
ولا تخلي
لا لقمه باقيه من اكللك ولا اكلي
حفظتك منذ لحظتها وعمري بجد مانسيتك
دا انا من كتر حبيتك
نسيت الدنيا من حبك
نسيت الناس
وتوهت كمان انا في شكلي
لا عارف ابتديها منين ولا لاقي بديل تاني
انا عايش بنار الفرقه مستني
سنين العمر سارقاني
وجيباني ووخداني
أعاتب نفسي واسالها
مين المجني ومين الجاني
انا ما زلت وحداني
ولسه الشوق بيكويني وقلبك لسه بيماطل
انا كرهت السنين بعدك ومتعذب بنار بعدك
لا عارف اعيشها من بعدك
ومن بعدك طلع باطل
انا عن صدق هاحكيها
والحنها واغنيها
بانك في الهوي شرعا
لكي حكم كما القاتل
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
