قصيدة : بابا . مسابقة الشعر العامى بقلم / ساجد محمد عبد الفتاح

عودي بيه اتصلب

و اسمي على اسمه اتكتب

رباني على الاصول

و علمني برده الادب

اول كلام انا قلته بابا

و اول كلام اتكتب

لما اتعلمت الكتابة

طول عمره ليا صديق

عالحلوة و المره رفيق

و لو فيوم أتخنق

فحضنه.. يروح الضيق

كان يلعب معايا

مهما كان تعبان

في الشغل طول النهار شقيان

و تلف السنين

و كل مادة بيكبر

و بيكبر جوه القلب و العين

لو في نظر الناس ضعف

في نظري مضعفشي

ده لو حس ان انا زعلان

طول ليله مينمشي

اية يعني شعره ابتدى يبيض

و تلف تاني السنين

و ابويا انا ..بقى جد

و عايز يبان لسة قوي

مش عايز يلجأ لحد

كل ما اشوفه بيتعب

قلبي بيتوجع

خليك معايا يا ابويا

لحد ما اودع

مش هقدر على فراقك

عاوز تسيبنا ليه

مالك يا ابويا مالك

سنة حياة دي اية

خليك معايا يا ابا

يا نعمة من ربنا

دي دعوة واحدة منك

تقلب ميزان عمرنا

على مين انا هتسند

لو فيوم سيبتني

من غيرك يا ابويا و الله

ضهري انا ينحني

من غيرك يا ابويا و الله

ضهري انا ينحني