قصيدة : باقولك إيه . مسابقة الشعر العامي . بقلم / محمد محمد الساعي

باقولك إيه ..

من الآخر ؟؟

حروف شعري وحروف شعرك ..

وشعر الموهبين تِمَّاً ..

مالوش لازمه

لا عُمرُه جاب غموس لرغيف ..

ولا بيْحِل يوم أزمه

يبهدل فينا ويمرمط ..

عشان معنى .. وتركيبة

وفي الآخر ..

بنرجع برضه بالخيبه

وصابع طَلْ م الجزمه

يا صاحبي اسمعني .. وافهمني

مكان الموهوبين دايما ..

في اخر الصف..

وواجهة شِعْرنا همَّا ..

نجوم السَّفْ

وخيبه بدُفْ .. بتلف الحياة بينا

وتبلينا بناس أرباع

بتتصدر عيون مشهد ثقافتنا ..

بديل .. وصباع

يادوبك واحده تنحنح تقول جمله

حيالله “تعبت”

ف تبقى نجمة الأجيال

وواحد بص في الميديا لقى ميغه

ف قال موال

وشاور بس بصباعه

وكام حركة كده بإيده

بقى تريند المجال كله ..

ياريته ما قال

مسارح تفتح الأبواب لأمثالهم

وتلفزيون .. وكام حلقه تبروزهم

ولو لمحوا في يوم بوزهم بقى معووج

محاسيبهم .. تطيح في الكل .. وعلاوله

ياعالم .. جننوا أهلي

ماكنش الموهبين أولى ؟

مقاوله .. واللي بيحاسب

كتييير في ثقافة الدوله

عتاوله في الهجص وخلاص

بكام كلمه .. ومرصوصه

وتركيبه .. ومنقوصه

يهدوا المعنى والإحساس

تعبت يا ناس

ف قمت وقولت راح أبطل

طلعلي 100 شيطان خناس

وخلَّاني .. كتبت كلام مالوش معنى

وايه هايفيد ؟؟

وفكرك حد هايفكر .. ويسمعنا

ف قال صاحبي :

ضروري الفجر راح يطلع ..

ويمحي الضلمه من جواه

بشعرا بجد .. تبني السد

وتحاجي على المعنى .. ومقصودٌه

ساعتها .. يستقيم عوده

ونرجع زي ما بدأناه