باي باي يا مدام
***********
من خلف ستاير شيش الفيس
الكل بيفتي كأنه إمام
وساعات بيثور
وبيزرع جوه الفيس ألغام
والحرب تدور
بين ناس بتعيش
ع العيش الحاف
وقطيع من ناس شبه الأغنام
والكل بيهتف للفريقين
من أول صوت ترانيم الديك
ولحد ما عقله وعينه تنام
مش عارفين ان الناس بتشوف
ف كلام الفيس زعابيب الخوف
وحروف بتسيب ف قلوبنا ألام
مش فاهمين أن حدانا عيال
عقلها بيميل لكلام الفيس
ورنين المال
مش عارفين ان حدانا حريم
مش فاهمة الفرق مابين أيام
تشبه للطين
وأيام بتميل مع صوت أنغام
من خلف ستاير شيش الفيس
القرد بيعمل إنه غزال
وغراب البين بروفيله زهور
وطيور وحمام
ومدافع واقفة على الجانبين
فوق غصن زيتون
بتقول من بعد الموت والخوف
هيطوف ع الدنيا الفانية سلام
والناس هتنام على فرش حرير
وهيطلع ليها جناح وتطير
وهتبقى تمام
وده كله كلام ف كلام ف كلام
بيخدنا نعيش جوه الأوهام
ونفوق على صوت فواتير النت
بتقول يافقير ادفع ما تنت
فواتير الواد وكمان البت
وفاتورة الست اللي ما بتنام
غير لما شيطان الفيس مايقول
باى باى يا مدام
***********************
رضا أبو الغيط
