بحبك
وبعشق كل من حبك
وبحلم بكرة نتقابل
واعيش عمرى اللى جاى جنبك
واكون ليكي
جمال الكحلة ف عينيكى
ولون الورد فوق خدك
بحبك وبتمنى
أكون لكفوفك الحنة
واكتبلك …بلون دمى
حروف اسمى مع اسمك
على شط الغرام بينا
ومابينا يكون حُبك
يا أم الدنيا يا أمى
انا ابنك وانا نبضك
ونبض القلب بيغنى
وبتمايل مع همسك
انا الفارس وانا الحارس
انا سلاحك وانا جُندك
بضحى يا امه علشانك
وبقتل بيكى سجانك
وأحزانك ….بحطمها
وبلضمها
مسابح حُب فوق أرضك
يا أم الدنيا يا أمى
أنا المسلم وأنا القبطى
وانا المؤمن بإنجيلك وقرآنك
بصلى الجمعة ف الأزهر
ويوم الحد ف العدرا
بصلى ياامه وادعيلك
ما تلمح دمعتك خدك
يا أم الدنيا يا أمى
انا فرحك وقنديلك
وغنوة شوق مواويلك
ولو ياامه تنادى لى
ف عز الشدة أنا أجيلك
وأصون ارضك وأصون عرضك
يا أم الدنيا يا أمى
أنا المفطوم على نيلك
وعز التمر ف نخيلك
بحن تملى لترابك
ونور شمعة قناديلك
م انا ابنك وانا منك
وسن تاريخى من سنك
يا ام الدنيا يا امي
انا ابنك
ولحم كتافي من خيرك
فمين غيرك يشيل همى
ومين غيرى يشيل همك
ومين ليها يكون دمى
بحور تروى عطش أرضك
ومين غيرك
هتستاهل تكون امي
ومين غيري
هيستاهل دفا حضنك
يا أم الدنيا يا أمي
بحبك
وبعشق كل من حبك
وبحلم بكرة نتقابل
واعيش عمرى اللى جاى جنبك
**********************
رضا أبو الغيط
