قصيدة : بحبك يا بلدي ..مسابقة الشعر العامي بقلم / نادية عبد المحسن آدم

الاسم
نادية عبد المحسن آدم
شاعرة عامية
محافظة الوادي الجديد مدينة الخارجة

https://www.facebook.com/profile.php?id=100021675562090&mibextid=ZbWKwL

شعر عامي
بحبك يا بلدي

بحبِّكْ ف معنى حَضَرْ ولَّا غابْ
بحبك ف عطر الحروف
ف الكتابْ
وسالب وموجب وِقسمه وعَادْلَه
ف معادلة حسابْ
واحبك لأن اللي فيكِ دا فيَّهْ
بنقسمْ وجَعْنا ونضحك شويّه
ويحكي اللي داخل
ويحكي اللي خارج
عن الورد لما ابتسم ف المناهِج
وسورة المعارج وطه وتبارك
ولادك نجومك بتفتح ستارك
واشوفك في حلمي سنابِل عفيَّةْ
واحبك عشان لسه فيا بهيَّه اللي عاشقه ياسين
ورقوة تِحَصِّن قلوب عاشقين
وكَفِّي اللي يختم بكلمة آمين
واحبك قصايد لنجم وجاهين
وامدّ الخَطاوي
واجيلك مخاوي
في قلبي الحنين
بحبّك ف نظره بتشبك عيون
واحبك جناين وساحة فنون
بشوفك جنون الحروف الشقية
اشوف فيها ريحتك بتنده عليا
ياقصه بيعزف ف نايها نجيب
ف حضنك تطيب الجراح العصيه
أنا لسه فيكِ انا لسه هِيَّ
ابتسامه ودليل
بحبك لأن الهموم راح تزول
بحبك زويل
وحارس أمين
طبيب لسه حالف ف حبك يمين
وإبني اللي حبك قبل الميلاد
وقلبي اللي حسك برغم البعاد
بحبك ميلاد
لفرحه تضلِّل
وبَكْره أبرر وأكْرَه أعلِّل
ورغم المصاعب ورغم المتاعب
وضهري اللي محني قصادك ومَيِّل
بشوفك سفينتي
واقولك حبيبتي
عشان بكره بيكي هيحلى ويِكَمِّل