قصيدة : بدر التمام . مسابقة الشعر العامى بقلم / رضا أبو الغيط

خاص بالمسابقة
فئة شعر العامية
الاسم رضا أبو الغيط _ مصر

بدر التمام
*****
ما تدي لقلبي اللي حَبك أمان
وقولي بحِبك يابدر الزمان
وانا اوعد جنابك وزهرة شبابك
اكون لك تملي ربيع الحنان
واكون لك شموسك
وكحلة عيونك
ولون القرنفل وريحة الريحان

ما تدي لقلبي اللي عاشقك أمان
وشاوري بعينيكِ أجيلك أوام
وفى حضن قلبك امدد وانام
واكون لك محبة ورمز السلام
واحارب عشانك فى كل اللي خان
ما إنت الحبيبة وانت الطبيبة
وانت اللي عِطرك بيملى المكان

قولى لي بحبك.. ولو بالكلام
وانا ابني لجنابِك ف قلبي مقام
واعدي عشانك بحور الضلام
واغازل عيونك يا بدر التمام
وأقول للأحبة وكل الأنام
مافيش بينا أصلا بوادر خصام
وقلبي عليها وعُمره ماهان

قولى لي تعالى نعيد اللي راح
ونِمسح بإيدنا دموع الجراح
ومدي لي كفك وطرف البراح
وطعم المحبة ف كاس السماح
وانا احلف ما اسيبك
ف جُب اللئام
واكتب ف حُسنك بديع الكلام
واكون لك صلاتك وصوت الأدان
ووحدة صفوفك ف وسط الميدان

قولى لي بحبَك وقلبي العطوف
مايقدر يخاصمَك ف كل الظروف
لأنك وليدي اللي ساكن وريدي
وإيدي اللي بيها بشيل السيوف
وانا اسهر عشانك ليالي طوال
أعد النجوم واعدي الجبال
وادون تاريخك ف أجمل ديوان