قصيدة: بدون اضطرار . مسابقة الشعر العامي بقلم / هبة سمير

بدون اضطرار

يا ليلك يا عينك يا ليلك غشيم

بيفتح فى قلبي دفاتر جحيم

يصب المواجع ب سم ورخامه

يدغدغ فى روحي فبعمل حِجامه

مانيش لاقيه حل لـ هزارُه التقيل

أقوله نسيتك، طريقك سلامة

بيسحر لي عقلي ويطلق بخور

فأضحك وأضحك وأرتب مشاعري

وأبعد قوايم وأقرب أسامي

ومين كان واجعني وسابني وسافر

ومين لسه حاضر في أول طابور

وأول سؤالي لحبيبي القريب !؟

ضفاير في شعري تطير أو تميل

ولو حبه مالت وفاتت في روحك

ح تقدر تغير عشانها النصيب؟

وفرحة خدودى في لحظة لُقاك

تفرق ورودي محبه لـ بهاك

فهل لسه قادر تكون لي نصيبي

وأنا نجمه دايره تنور سماك ؟

ولمسة إيديا لحضن المخدة

تداري المشاعر وتبعت مودة

وأغمض عنيا تشوف دبلة فضة

تزين صوابعي فـ تحلم معاك.

وتحلم عيونك تشوفني النهاردة

ومن غير مناهدة أضمك لحضني

وكل الكلام المناكف مسلِّم

رسومه وحروفه لسكة هواك

أنا كنت وردة رحيقها اتسرق

لا طالت جنانين ولا حتى عطر

فـ صلت وصامت عن الأمنيات

وضحوا بحياتها برخص الفُراق

وفاتوا اللي باقي تذاكر وقطر

وستر المشاعر مكنشي القرار

ضلوعي في عروة وحبك زرار

وكان كل أملي أفصَّل حياة

ما بيني و بينك بدون اضطرار