بطبخ م الفسيخ قراميط
ساعات بكتب
ساعات برسم
ساعات بطبخ
ساعات برضو بنط الحيط
ما انا فاضية
فبعمل م الفسيخ قراميط
بجيب كام بصلة مجنونة
وتومة معطرة لمونة
وفرن ناره مسكونه
بدون ورقة ولا تخطيط
مانا فاضية
فبعمل م الفسيخ قراميط
وبطبخ باميه بعكاوي
ف قرب دوق دا لو ناوي
هقولك ايه ما هو الغاوي
بيكتب شعر وسط الغيط
وانا شاطرة وبعمل من الفسيخ قراميط
وبرسم لوحه في العشة
لفرخه وديك يناكشها
يقول لها كاك ف يكسفها
تقوله جواز يطنشها
فضغطوا عليه بعد الفاتحة فركشها
اساسا هو ديك وحويط
ماليش دعوة
ماليش دعوة!؟
ما انا فاضية وبعمل م الفسيخ قراميط
على منصة
بشوف الكاهن الاعظم
بيتمرقع على الغنادير
ونفسه ف لفة في الحناطير
فبيثني عليها كتير
يقوم ينقد كما الأساطير
دي اول خطوة في التظبيط
ماليش دعوة
ماليش دعوة!؟
ما انا فاضية
فبعمل م الفسيخ قراميط
وفجأة يعدي هنّاتها
ويحلف ليلية بحياتها
ماسمع الشعر غير صوتها
ويبدأ رسم بالتنقيط
ماليش دعوه
ماليش دعوة!؟
ما انا فاضية
فبعمل م الفسيخ قراميط
خلاص طيب منيش جايية
دي مش ندوة
دي يابني للحمام غية
وانا طربشة
مبعرفش الملاغية
هيبقي لا غني ولاصيت
ماليش دعوة
ماليش دعوة!؟
ما انا فاضية
وبعمل م الفسيخ قراميط
خلاص طيب منيش راحة
دي هوجة شعر بصراحة
وانا من مرضى لجراحة
دا بيرهم يابا بحره غويط
ماليش دعوة
ماليش دعوة!؟
ما انا فاضية فبعمل م الفسيخ قراميط
خلاص
انا شاعرة من منازلهم
لكن بحروفي بنازلهم
وطرح شباكي يغزلهم
دي اول غرزة ف التخييط
بقولوكوا ايه
انا اصلا منيش فاضية راحه اطبخ م الفسيخ قراميط
