بعتذرلك
عن غيابى
لما كُنتى محتاجانى
بعتذرلك انى سيبتك
وانتى سيبتى الناس عشانى
عن حنانك
اللى يملى الكون بحاله
قلبى مش هيلاقى زيك
مهما بعدك الف جاله
بعتذرلك عن وجودك واهتمامك
بعتذرلك عن عياطك بين كلامك
وانى كنت غريب فـ حُضنك
بس حُضنى كأنه بيتك
وانى عُمرى ما قولت بكرة
هبقى احلى عشان لقيتك
طب يا ريتنى ما قولت نبعد
او هقول احسن يا ريتك
كُنتى مختارتيش اسيبك
كُنتى زَودتى العتاب
كُنتى بس صبرتى حبة
كان دُعايا هيُستجاب
بعتذرلك عن طريقتى
وعن قرارى و عـ الغياب
وانك انتى حقيقى جنة
والغلط كان عـ اللى ساب
بعتذرلك انى دايماً
كنت مبشوفكيش قُصادى
حتى لو كونتيلى بكرة
كنت شايفك لسا ماضى
بعتذرلك عن حياتك
اللى كُنتى بتديهانى
وانى كنت ضرير لـ حبك
وانى كنت زمان انانى
بعتذرلك عن ظهورى
اللى غيَرلك حياتك
وانى مهما كبرت فيكى
بكره هبقى فـ ذكرياتك
كل حاجة زمان معاكى
كات جميلة وحلو جداً
بعتذرلك عن دُعاكى
وقت كل ادان بيدن
كل حاجة فـ وقت قربك
حلوة جداً هينةّ
بعتذرلك عن قساوتى
لما كنتى حنينّة
بعتذرلك عن وعودى
وعن سكوتى وعن بعادى
بعتذرلك عن ردودى
اللى كان اغلبها عادى
بعتذرلك عـ الليالى
اللى ياما سهرتيهالى
عن وجودك جمب قلبى
فـ كل شدة وكل محنة
عن كلامك اللى اخره
كان تملى بيبقى احنا
وانى كنت غريب فـ ارضك
حد تايه جوه بيته
واكتشفت ان انتى فعلاً
احلى قلب زمان لقيته
نفسى بس تسامحى قلبى
زى منا أوقات سامحتك
ده الشوارع فيها ريحتك
والقمر شبهك تمام
والكلام لو كان لـ غيرك
يبقى اصلاً مش كلام
بعتذرلك انى دايماً
كنت ناسى الاهتمام
او كأنى نسيت شعورى
حد حب يعيش بعيد
العلاج كان هو انتى
لحد دايماً كان مريض
بعتذرلك عن سنينك
واللى ضاع منك هوا
وانك انتى زمان حلمتى
اننا نفضل سوا
بعتذرلك واقبليها
بعتذرلك عـ اللى فات
كل حاجة بنلاقيها
بتبقى فوراً ذكريات
حتى قلبك رغم وجعه
كان فـ كل حين متاح
بعتذرلك عن ماضينا
وجى طالب السماح
بعتذرلك و بـ ندم
ع اللى فيكى وعـ الدموع
بعتذر عـ اللى اتهدم
واللى راح من غير رجوع
مُستعد اعمل عشانك
اى شئ يمحى الجراح
بعتذرلك عـ الحكاية وعـ النهاية
وعـ اللى راح
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
