قصيدة : بعدت وعمري ما اتخليت .مسابقة الشعر العامي .بقلم / هالة إبراهيم أبو المعاطي

بعدت وعمري ما اتخليت

أنا مش  أم مثالية
أنا قاسية وأنانية
انا خربت انا قصرت
أنا هديت
ومطلوب مني أتاسف
أنا آسفه أنا اضطريت
ماشيلتش شيلة مش شيلتي
ما زودتش سنين خيبتي
وعارفة قدرتي وطاقتي
وسبت المركبة ونطيت
بعدت صحيح
بعدت وعمري ما اتخليت
وأمر الله نفذ فيكم
نفذ فيا
ويمكن خير
في عرف المجتمع قادرة
وقلبي حديد
ما عادي الأم
تتعذب وتتألم
تنام وتقوم على التهديد
ولا تعدي حدود البيت
أنا عديت بحور أحزان
وطبعي كان جَموح حرْنان
مايلزمنيش أكون  بطلة
وأعيش مقهورة مطفية
عشانكو انتو
عشان نفسي
عشان الحزن كان ناشع
على الجدران
وشاب القلب من بدري
فكنت إزاي هاربّي عيال
وهادّي إزاي أمان وحنان
ميزان العدل ليه خربان
ماكنتش باعرف  اتبسم
وشفت الدنيا  مطفية
بدون ألوان
وكنت لوحدي باتخانق
مع ضعفي
وما املكشي لا جاه ولامال
والوم نفسي مع لومكم
وأنا بينكم شبح شارد
وجلادي  طليق  فرحان
ويرضي مين
هلاك روحي وأحلامي
ومين يكره
أعيش تاني
ترد الروح يا ناس فيا
ومش محتاجه ألقابكم
طلبت السلم والهدنة
وكنت سليمة النية
بلاها منظرة ونياشين
انا مش أم مثالية
انا بالقرب جنبيكم
تنادوني تلاقوني
بالبي وروحي تفديكم
وعارفه مهما أديكم
انا موصومة بالخذلان
انا مش أم مثالية
بكل اللي حصل
راضية ومرضية
أنا عديت ومديت إيد
تعديكم ل  بر أمان
أنا مش أم مثالية
وعالم ربنا بيا
ومهما توصموا قلبي
هيفضل ليكو نبع حنان

: الاسم /هالة إبراهيم أبو المعاطي
اسم الشهرة / هالة عصفور
من المنصورة٨