قصيدة : بعد التحية والسلام . للشاعر / السيد العبد

يا بعيدة ياللي محبتك

هيّا الحكاية .

يا جميلة ، زي الشِعر

ليه ف السحر آية .

ولسه رغم الحزن مكتوب

ع المرايه.

عايش عشانه ،

وقولي عنه إنه ساكن من سنين

جوه ف حشايه.

موال حزين

من قبل حتى ما تعرفي

إيه البدايه .

ويمام غريب كان مفترض

يضحك معايه .

لكن بُكاه سابق بُكايه .

أوصفلك إيه غير الألم

غير الحنين .

أنا زي كل المشتاقين .

من قبل ما يبان الطريق إنه ندم

ماشيين .

من قبل ما السطر الأخير

يهزم قصايد حبهم

باكيين .

عاملين قصاد الناس جميعا إنهم

عايشين .

ويبانو قدّام الغريب قبل القريب

ضاحكين .

وهُـمَّا أصلا مدبوحين .

والله شابو وهُمّا لسه شباب

والله شابو من سنين .

خايفين يشوفو الحب ذكرى

وهوا ذكرى من سنين

لسّاك يا طير الحب بتغني

لعل المجروحين .

ينسو الفراق . ينسو الألم .

ينسو الأنين .

أحب أقولك إنهم

مهما العذاب اشتد مش ناسيين

لسّاك يا طير عاوز تغني الحب

واللي بيسمعوك شاكيين .

الدمع مالي قلوبهم العطشانة شوق

فبلاش تغني بلاش

مادام ساكتبن.

روح غني للناس اللي فارقوهم

ميتين .

أو قول لهم من حزنهم

خايفين .

واحلف بربك إنهم صابرين .

علشان حبايبنا العزاز

لا الدمع يكسرهم ولا

اللحن الحزين .

وعشان يكونو ف هجرهم راضيين .

أمّا حبيبتي ، فقول لها

مستني أشوفك من سنين .

بس اللي سارق ضحكتي

هوا الحنين .

أو قول لها موال

عن الحلم اللي كان مفيهوش ألام

مفيهوش فراق

مفيهوش خصام .

موال حزين

قبل البداية بفرحتين عرف الختام .

مليون تحية لضحكتك

مليون سلام .