قصيدة : بكتبلك . مسابقة الشعر العامي بقلم / هاني الحوت

#بكتبلك

ومين في الكون ميعرفش اللي كان بينا

دي قصتنا اللي عشناها بيحكيها التاريخ ويعيد

يا ضحكايه لأيامي ومشواري اللي مهما مشيته لسه بعيد

يا اول حب حبيته وحسيته وخليته يدوق الحب على إيدي

يا نبض بيجري في وريدي

دخل بابي بدون مواعيد

يا حب ومهما مر عليه الزمان بيعيش ويتجدد غرام ويزيد

بحبك والزمان يشهد

بحبك والنجوم تشهد

بحبك والقمر يشهد

بحبك والليالي تقول وتحكي غرامنا للعالم

بإنك لسه عشقاني ولساني بدوب فيكي

ولسه عنيكي بتقولي بحبك وانت عني بعيد

وبشتاقلك وبشتاقك ومحتاجه تطبطب إيدك الدافية على روحي يا نبضي ودنيتي وروحي

في بعدك عايشه بجروحي

في قربك نبض قلبي سعيد

ولسَّاك في الضلوع موجود

ولسَّاني بعيش على وعد كان بينا

وبفتح كل يوم شِبَّاكي واستناك

وأقول هيجيني يوم وتعود

بحبك مهما تبعِدنا السنين وتمر

بحبك مهما قالوا الخلق حُبك مر

واديني بمر ناحيتكم ومش شيفاك

لكن شيفاك عيون قلبي بتكتبلي قصيدة شعر لي وحدي

وتحكيها بنغمة عود

وسميتها على إسمي

وقولت يا حلوة بس تعالي وأبتسمي

عشانك بس بكتبلك وهكتبلك ولو طال الزمان بيَّا لا هنساكي

دا في سماكي يا ست الحسن أنا طاير

وادي جناحي اللي عَجِّز مـ الزمان مفرود

بحبك مش كلام ولا شعر ولا تعبير دا إحساسي

عشقتك والتقيتك ضهر يسند ضهري لو حمل الزمان قاسي

يا ورده وعطرها الفواح ملا سنيني

يا شجره وضلها مـ الحر يحميني

يا بدر ومهما كان الليل ضلام حالك

أنا في بُعدِك غريق هالك

ولا غيرك ينجيني

بحبك… قد ما الأيام بتفرد سطوها على حال ضعيف

قد ما الأحلام بعيده عن عيون عاشق كفيف

قد رمل الصحرا واكتر

قد ما الأحزان بتكتر في الشجر وقت الخريف

لسه بكتبلك قصايد وارسمك وسط الحروف

لسه إيدك شابكه فـ إيدي

وضحكتك ماليه الشوارع بس خباها الكسوف

لسه شايفك زي ما انتي جميله حتى في وقت حزنك

لسه قمره برغم إنك عايشه أوقات الخسوف

لسه بكتبلك وهكتب وأحضُنِك جوه الحروف