الاسم /بشرى امين محمد احمد
اسم الشهرة /بشرى الوردانى
نوع المشاركه/ شعر عامى
عنوان القصيدة /بلا عودة
العنوان ميت غمر –دقهليه
عنوان القصيدة/ بلا عودة
بقلم /بشرى الوردانى
وفى عب الغيط
كان كل سلامه مرمى هناك
على طين الأرض اللى اتعكر
من بعد مامات
جميزه عجوزه مع توته مكسيه صفار
وشواشى النخل الفرحانه
ماعدتشى بترقص كالعاده
ولاتفرش ضلها ع الدار
من بعد ما ودع ألوانه
نضارته السبحه عكازه
منديله موبايله وجرابه
ودموعي معلقه على كمه
ولضمت الابره بعيونه
وبلم جروحى وبضمه
بروزت الصوره فى ضلوعى
لاجل أفضل حضناه
وموبايله لسه وبنفس الاسم
انا كتباه
وقت أما يررررررن
يدينى ابويا
ايوه معاه
تربيعته
والشلته بتاعته
ويروح فى النوم
وقعاده على الدكه
سيالته المليانه بفكه
والرعشه والخوف من بكره
بإيده على إيدى ويتكى
شيال الهم يابويا صحيح من يومك
دراعاتك حضن امااااااان
بيلم الجرح
كان يصحى يزق الليل من جنبه
يصحصح كسله يشد الشمس
كان آخر حلمه يشوف الكون فى عيونا سنابل قمح
والعمر الدائر فى مدار ساقيه بيتنا
وينازع شوك فى شراقى الأرض إن حام على غيطنا
يبدرها عبير
تطرح له ورود تفتح فى قنايته
سواقي العمر تدور. وتدور
وتعيد فى حكايته
وفى جنب الخلق يعيد حساباته
ومعبى جيوبه بحبة حب
وحبة صبر
وحب الحب في عز مماته
ماهو راجل آمن بالارزاق
كان هوه الكل وهوه البعض
كان هوه السما والهوا والأرض
كان هوه الشوق الساكن فرض
يدخل نور اليوم التالى م الكواليس
بعد ما شدوا ستار العمر
كرباج الناس أصبح تسقيف
مش شرط انزل بوست هناك ع الفيس
او اكتب منشور فوق صورته
او موجز فى الاهرام عن إن اليوم كات سناويته
شرايينى ملضومه بريحته
وحروفى منبته جوا جدوره مفرعه اسمه
ودى اخر حاجه من الذكرى
بيلملم تفاصيله فى شنطه
والبصه كات غير البصه
وحروف الشعر بتتسابق
وتحط النقطه على النقطه
الحلم اتكرر بلا فايده
وقصديتى دموعها نار قايده
تذكرته ذهاباً وإيابا
أبحرت ونجمت كثيراً
بس المرادى بلا عوده
