ط
مسابقة الشعر العامى

قصيدة : بلدنا زرعِة قمح . مسابقة الشعر العامى بقلم / عرفات سعيد عادلي

شاعر الجنوب

مشاركتي في مهرجان همسة فرع الشعر العامي
الاسم / عرفات سعيد عادلي
(شاعر الجنوب)
الدولة / مصر _قنا
رابط الصفحة الشخصية / https://www.facebook.com/profile.php?id=100003574996561
{ بلدنا زرعِة قمح}

بلدنا زرعِة قمح

والكل فيه طمعان

تطرح بدون تأخير

وتعطي للغلبان

كايدة عِداها وشوف

بناتها والشُبان

حِزمة دهب يبرق

رجعني لو غلطان

رجالة بره وجوه

وقت المِحن جدعان

ولا لينا تلقى شبيه

نفرق عن البِلدان

مصر البلد فينا

كالنقش ع الحيطان

نبعد نموت جايز

ننساها ضرب جنان

نشرب من نبع خيرها

نرويها شوق وحنان

يا بلدنا فيكي الطب

والفن والفنان

فيكي الآثار والعلم

فيكي الحرير والزان

فيكي الكلام حِكمة

فيكي العلوم ألوان

ومهما كان الصعب

وقت المحن بنبان

معدنا طيب قوي

فينا الكلام خلصان

وادي الكلام ليكم

بكره يكون عنوان

طول م الهدف واحد

والقلب ليه ميزان

هتكون بلدنا عمار

وجنة م الرحمن

وكل حد خذلنا

بكره يبات خذلان

نصبح بعزم جديد

أحلامنا في الإمكان

شبابنا بدأ العمل

ودَس كل جبان

كل التحايا لكم

ما تحييوا يا جدعان

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى