قصيدة : بلدنا كانت هنا .مسابقة الشعر العامي .بقلم / أشرف الشناوي

……… بلدنا كانت هنا…….

كانت بلدنا زمان/ ترعه وبيت وأمان
وضحكه صافيه جميله/ وعيله جنب العيله
وفرن عيش داير / مكنش غيط باير
نخله وتوته وساقيه/ وزير وقله وكوز
ابريق وبالبزبوز/ سلمي وهند وفوز
وصبايا زي اللوز
وحيطان بطوبها الني /عشقت حبال الضي
وراديو جد عتيق/ يسمع غناه الحي
كانت بلدنا زمان/ زي عروسة البحر
والكل من حبها/ يدفع حياته المهر
والنيل على كفها/ يملا الغيطان بالزهر
ويلف فيها يطوف/ تلقى الحكاوي الوف
وتحس فيها بدفا/ وكأنها من صوف
تلقى اليمام عالشجر /واقف مع العصافير
وحمام عرف غيته /يطلع يوماتي يطير
مافضلش من حلمها/ لاخيل ولا حناطير
راح الجمال وانتهى/ واندقت المسامير
بلدنا وفي نعشها/ نامت في مش حصير
ماعدش ينفع لها/ لو حتى الف غفير
بلدنا كانت هنا/ مش رسمه بالطباشير
من يوم ماراح الغنا /دق البيبان امشير
قلع البيوت والشجر
فهربت العصافير……………..

اشرف الشناوي
شاعر عاميه
البرامون
المنصوره