الإسم : دينا السيد لطفي
جمهورية مصر العربية – محافظة : دمياط
نوع المشاركة : مسابقة الشعر العامي
إسم القصيدة : بنعمِل إنِنا ناسيين
رابط صفحة الفيس بوك .
__ بنعمِل إننا ناسيين __
بنعمِل إننا ناسِيين …
لكن فَـاكرين حَاجات ياما ،،
حَاجات لِعبِت بأحزانا
وسَابِت بَصمة وعَلامة ..
وكانِت بإختصار أخطر
ظُروف ، حَصلِت في وَقت عَصِيب ..
في وَقت ماكُنا بِندَور ، علي ضِلة ،
في حُضن حَبيب ..
فيه ناس فِعلاً مارَحمتناش
وِرَقصِت فـوق جِراحنا كِتير ،،
وناس أصلاً ماتِعرفناش
وعملت ياما صَح وخير ..
عَشمنا كان ياعيني كِبير ،
في ناس فِعلاً أمنالهُم ،،
سَابونا في عِِز ذَنقِتنا ،
وحَذفُوا الرَحمة من بالـهُم ..
أخدنا الضَرب في ضُهُورنا
وعِيشنا في وِسط ناس خَاينين ،،
ويام إتزَق إحسَاسنا في بِرَك الهَـمّ
ويا الطين ..
دُموع نِزلت لبني أدمِين ،
وطلعوا خِدعَة مُلتَفة ،،
يتُفوا العِيبَة بلسَانهم ، وتاني يلحَسُوا
التَفة ..
وقَعنا زَمان علي جِدُورنا ،
نِزلنا بتُقلِنا في القَـاع ،،
ماحدِش مَرة سَنِدنا ، وفَكر يِشتري المِتباع ..
مافِيش في القلب مَوقف ضَاع
ولا أصْلاً زُرَار للحَذف ،،
مافِيش غير غُرفة للأوجاع ، بتحفَظ
في الألم والنَزف ..
قَدرنا مكانش جَاي علي العَزف
ولا إحسَاسنا في النُوتة ،،
وأحلامنا نَصِيبها تمُوت وهي لسه بَنُوتة ..
حِلمنا بشجرِة التُوته ، وراح الحِلم للخَفافِيش ،،
مافيش حاجة بِننساها ،
ولا هايروح أثـر م الفِيش ..
غُلبنا نقول بإن مافِيش ،
ونِعمل نَفسنا ناسيين ،،
وتيجي الصُدفة وتِبَين ، حاجات ياما
في قلب العِين ..
