الإسم : سماح محمد خليفة
الشهرة: سماح خليفة
مسابقة شعر العامية
رابط الصفحة على الفيس بوك
بنكتب ليه
————
عشان إحساس يطمّن إنّنا عايشين
وهيّا الفضفضة شوية
دي بتنزّل هموم من ع الكتاف وتشيل
بنكتب ليه
عشان الحالة والنفسية في النازل ،
فتطلع حتى سلمتين
بنكتب ليه
عشان ناسنا الجميلة الزين
تشوف الحرف فيه منها ، ويشبها
مهوش خواف
يحرٌك م الركود إحساس
في ساعة لما يخبطها ..
في لمس كتاف ،
فترتاحله أوام ف الحال
وتستناه ويتقابلوا سوا حبيبين
ويا بخت اللي وفق ..
إحساسين في حلال
بنكتب ليه
ومش هاكتب يا سيدي ليه ؟!
مدام الحرف له قيمته
ووسط زمايله ماشي بيه
يقول الحكمة تتصدق
ولايقة عليه
مدام مكانتش بالعافية ولوي دراع
ولا فارض إتاوة عليه
دا بينا محبة عايشة سنين
وفيه تقدير
بنكتب ليه ؟
أنا بكتب عشان نفسي
عشان غيري
وانا مؤمن بإن الكلمة رسمالي
ومن غيرها باشوفني فقير
بنكتب ليه
عشان إحساس بريء شفاف
كأنه قزاز
دخل في السجن عمياني ،
وبيعاني ..
كإنه غريق
ومحتاج فرقة م الإنقاذ
فبيفضفض مع الأوراق
ويعمل منّها مركب تكونله نجاه
مهواش عيب
علاقة إحتياج يمكن ..
مريض وطبيب
فيوصف داء بفحص وصورة للحالة ،
معاها مجاز
ولما يلاقي كلمة تِطيب
تحن لحاله وظروفه
تمد الحرف له عكاز
يحس أوام بحاله دا راق
يلم الباقي من أشلاء
يحس بإنه له بصمة ..عمل إنجاز !!
فيتحول ويصبح من مريض لطبيب
بحكم التجربة يوصف
بإيده روشتة للمحتاج
هِبات من ربنا العادل
بيوهب لينا م الإلهام ساعات ترياق ،
حروف بتقيد
بنكتب ليه
عشان الحق ميحسش بإنه وحيد
يقوم الظلم يطمع فيه يحط عليه
فواجب كلنا نسانده
واهو مساهمة وإن كانت ..
علي قدي وقد الإيد
ولكن م السكات أحسن
أكيد برضو
بنكتب ليه
عشان قَدَرِي اللي حبيته
جنايني وجنب بيت الشعر ..
كان بيته ،
بقينا اصحاب
بنتبادل سوا الأفكار
وكان يسمحلي أقطف حبة م الأزهار
وازوقها بكام صورة تكون تذكار
وبَعد النص وكتابته
برغم سهر وفيه معاناه
بيكفيني ثواب باخده
في ساعة لما ناس يقروه
يقولوا الله
