قصيدة : بنوحش بعض . للشاعر اللواء / محمد هيكل

وحتى و احنا قدام بعض

بنوحش بعض

فما بالك بقى ف البعد

بتبقى الوحشه قتلانا

بيبقى حنينا ل لقانا

حنين قتال

حنين قادر يهز جبال

أنا وانتي غرامنا كبير

و ف الوحشه بنبقى عيال

.

و نبقى ف اللقا طفلين

بينسوا الدنيا

لما يلتقوا بالعين

و ينسوا هما مين أصلا

وهما فين

يثور فينا الحنين فجأه

ونوحش بعض ف الثانيه

شهور و سنين

بنوحش بعض انا و انتي

من الضافر لرمش العين

.

و رغم الجاي و اللي فات

و رغم الدنيا و المسافات

بنوحش بعض بالهمسه

و بالنظره و بالحركات