ولاء الدين فاروق محمد
مصر .. الجيزة
واتس اب 01117766279
شعر العامية
*بيان هام *
الجدير بالذِكر إنى
قلت إنها حِتة منى
خَيبِت ف الحِسبة ظنى
جَت وطِمعِت ف البقية
مََلَكِت القلب ونبضُه
الكلام سردُه و ردُه
م الحاجات الحلوة برضو
تعشَقك بنت شقيه
ثم تتسرسِب لروحَك
يلتئِم منشأ جروحَك
فجأة تلقى كل بوحَك
وصف لجَمال الصبية
بالإضافة و فـ الحقيقه
الخصام دا يدوب دقيقه
ليها اكتر من طريقة
تسحب الزعل اللى فيا
ثم علما للإفادة
واخده اكتر من شهادة
أعلى درجات الإجادة
فـ الغرام و المسئولية
عارفة امتى كمان تطبطب
امتى تخطف .. امتى تهرب
حتى وقت لما بغضب
هى دايما حاسة بيا
فـ الخِتام شُكرى الجزيل
يبقا رابع مستحيل
يوم يكون ليها بديل
مين هتقدر غيرها هى
مين هتقدر غيرها هى
بقلم .. ولاء الدين فاروق
