الاسم / هبه سمير محمد امين اسم الشهره / هبه سمير العنوان / العبور _القليوبيه #مسابقة_الشعر_العامي اسم العمل / تجاعيد الوش -------- تجاعيد الوش بتِتْسابِق والحَبْل السُّري حزين ع البُعد ازاي بتكون ابن لْقلبي!!! وازاي سِكِّتنَا مْعاكسه لبعض !!! أنا فيك كَفيت عُمري بْعُمري ما كفايه غياب وجِرَاح وْعْناد ماصعِبِش عليك ضَعفي وحِيرتي الحُزن اتمَكِّن مِنِّي يا وَاد يا حَمام الشُّوق ابْعَتلُه سلام قَرْصاني ضلوعي مْن الوِحده أنا بَابْري فْ روحي مْن الأيَّام مع إنْ حياتنَا فْ روح واحده لِسَّاه البيت مُشتاق لخُطاك والبُعْد فْ حَلْقِي مْمَرَّرْني اتيتِّم قلبي الِّلي اترَجَّاك ماتلِم الشَّملْ الِّلي كَسرني أنا روح ملفوفَه على الخَطْوه والقَلْب مَاعادْش فْ جُوفُه كَلام والْقَهْرَه بْتَاكُل فى عيوني بتنام النَّاس وانا عُمري م انام.. بارْكَع وادعي لَك فى السَّجدَه وانا رُكبى بْتِشْكِي الحال بـ حالين.. واسْتَحْمِل وَجَعي واقول عَدّىٰ بَس انتَ تْرُد الدَّعوه آمين .. افتح أبْواب الحِنيَّه واحضُنِّي بقلبَك ماتْسبنيش رطَّب بحنَانَك أُكرِتنَا أنا لِسَّه بَعيش لَكْ مابَعيشلِيش ما تْبُص شْوَيَّه بْعين رَحمَه دي حِيطان البيت قَاعْدَه بْتِبِكي شُوف حَسْرِة قلبي علَى غْيابَك ودموع العين الِّلي بْتِشْكِي وِيَا شَطْ الحُب ارْمِي المُوجَه واسحَب لي القَسْوه وْبَوِّشْهَا بَاسرَق مِن صوَرُهُ الضِّحْكَه زَمان وادِّيِهَا لْعيني تْحَوِّشْهَا ... يا وَاحِشْني وْوَاحِش قلبي كَمَان ده العُمر بْيِنْزِل 100درجه اتْغَرَزِت رجِل مع الأحزان والتَّانيه بْتِسْتَنَى الْخَرْجَه وميزَاَنَك طَبْ مْن الْغيِبَه مَرَحَمْش الحِمْل علَى النِّنِي دِي الغُربَه بْتكوِي الجَرح عَشان مِحْتاجَه لْــ حُضنَك طمِّنِي بِالله يَا ضَنايَا عشانِي تْعود العُمر اتْبَتَرِت رِجله عَشان ماجْرِيش لِيك مرَّه وكان حَافي كان لابِس حُزني مْن الأيام وانا لسَّه باقول ابْني الوَافي لسَّاني باشوفَك يا ضَنايَا أبْرَأ مِ الهِدْمَه على كْتَافي
