قصيدة : ترانيم الألم .بقلم الشاعر / بكر بسيوني

_____ ترانيم الألم _____

لو دندن البلبل بصوته الجميل

و ضم قلبي تحته جنحاته

و كنت أنا وحدي نديمه

ح أقفل وداني في وش أنغامه

علشان أنا من زمان

سمعت كل الغنا كداب

…..

ولو حضني بحكمته الفيلسوف

و فطنته المحفورة في عمر الزمن

و بدأ يوجه لي كلامه

هاخد طريق غير طريقه

و همشي بعيد عن ندوته

علشان أنا من زمان

مؤمن بعدم جدوي الكلام

…..

لو حشولي فرشتي بريش النعام

و طرزوا لي ستاير غرفتي بأجمل الأحلام

محال تغمض جفوني

مهما يزيدوا في لومي

علشان أنا من سنين

ضيعني في مكرهم نومي

…..

لو النجوم لأرضهم نزلت

ولو داري في الفضا طارت

و لو الضفاضع في الشتا نقت

و الدنيا في يونية شتيت

و لو بفصاحة الحمير نطقت

و النملة صبحت في حجم الفيل

مش هندهش بعد إللي شوفته

علشان أنا من زمان

إحساسي بالدهشه مات

و عجبي