ط
الشعر والأدب

قصيدة ( تروس الحب ) للشاعر / أسامة عبد العزيز

تروس الحب”

الحُب كان إنسان

قَسمُه الوجع نُصّين

ترسّين بُعاد عن بعض

دايمًا مابينهُم وعد

يتقابلوَا فـ الاَخر

كان الزمان ساخر

يضحك ويحِني الروُس

شايف تروُس وتروُس

بتلّف ورا بعضها

دراويش ماليها العَشم

تحلم تشوف نُصها

وتروس بتِستَغَبىَ

بيسيل أوام ريِقها

تُدخل فـ ضِد فـ ضِد

وفـ عكس تَعشيقها

وسنانها تتكسّر

وتقضّي باقي العُمر

عايشه بتتحسّر

وتروُس بتتعشّق

مع نُصها التاني

نفس الشَبه واللون

والطبع والمضمون

دخلّت سِنان فـ سِنان

وإتشكّلوا إنسان

تِفضَل طبيعي تروُس

وفـ شكل إنساني

الكون ده ليه تنظيم

والخَلق مِتسَاقَه

الحُب سحر عظيم

أرواح بتتلاقى

طِبقًا لعِلم الروح

عُمر الحبيب مايروح

على حاجة مش شبّهُه

وإن كان بعيد وبعيد

تلقى اللقُا مواعيد

تلقى الشَبِيه ندهُه

فإن كُنت ناوي تحب

حِب اللي يشبهلّك

لازم يكون نُصّك

ويكون هواك قابلُه

وان ما اتقَابِلت معاه

إياك تقول دي حياة

وتحب مين تلقّاه

أو حتّى بتقابلوا

#اسامة_عبدالعزيز

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى