مسابقة الشعر العامي
..
قصيدة بعنوان: تكرار مقصود
..
الدنيا خليط من شَعْرْ الراس
كل ما يِبْيَض تُقَعْ وردة
وتعيش الساعة الرملية
وتسرسب نبضة ورا نبضة
كان عندك حق تقول ماحصلش
وقت ما تتلام على حلم قديم
كان عندك عيِّل ما بيكبرش
فقتلته بإيدك قتل رحيم
وسمعت صهيلُه في يوم جُواك
بيقول لَوْلاك أنا كُنت كبرت
مع إنك كان مفروض تبكي
إزاي خبيت البُكا، وضحِكْتْ؟
آه يا واد يا خبيث!
والـ آه عن آه تفرق
وساعات ..
لا تُنبِئ عن لُغة مش كاملة
يمكن تكرار الشيء مقصود
ويغيّر معناه في الجُملة
ويأكّد حُزن
أو زي إشارة بتتكلم
عن إيد ممدودة
بتطلب حُضن
أو روح بردانة بتستنجد
بشوية قُطن!
والقُطن ما بيدفِّيش بردان
لو كان البرد ده من جُواه
بس إحنا إتعوِّدنا نقلل من قيمة الـ آه!
طب كان ياما كان
وما دام ياما
إلبس نضارتك وكمامة
وعيّط على قد ما كان نِفسك
ماتموتش غريق
البحر الواسع من برّا
كل ما بتغوّط فيه بيضيق
وحلاوة الروح رغم الخنقة
عمالة تعلِّي في صوت نَفَسَك
يمكن ماتموتش
يمكن بكِّتَك الأغنيَّة وهي ماتقصُدش!
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
