( تلات راقات )
للمشاركة في مسابقة مهرجان همسة الدولي.
فئة المسابقة (العامية )
للشاعر/ محمد عيد محمد عسل
إسم الشهرة (محمد عسل )
مصري/ محافظة البحيرة
هاتف 01010431461
01282563520
( تـلات راقـات )
آخر قصيدة شِعر ممكن تتكتب أو تِتسِمع أو تتقرا
من بعد منها فيه سكوت ومتسألوش ليه يا ترىٰ
والدي اللي مات كان هو أكبر كلمة بتهِز السُكات
هبدأ قصيدتي بالدُعاء علشان ينال المغفرة
يارب تقبل دعوتي ويلاقي جوة القبر نور
يارب تفتح له بيبان الجنة عبدك كان صبور
يارب بادعي ودمعتي عمالَة تمسح في السطور
والدي اللي مات لو روحُه ترجع بالعِياط
انا هابكي دم عشان يعود الوقت قبل الموت ورا
والله يابا وحشتني
من بعد منك سِبتني لـ كلاب بتعوِي على السِكك
مع إنهُم كانوا يهربوا لو لمحوا طيفك عالطريق أو سِمعوا رنة جزمتك
دلوقت وحدي بقيت أخاف والحِمل زايد عالكِتاف
مانا ضَهري يابا إتقطَم من بعد ليلة فُرقتك
صاحبي اللي مات
مانا وانت كُنا صحاب وبيننا كتير حاجات
مثلاً نصايحك ليا في ليالي السفر
وإزاي أكون لله مُطيع لو حتى كل الكون كَفر
وإزاي أعيش بين الوحوش مع إني زيك مـ البشر
من بعد موتك قلبي مات والدمع رافض للسُكات
والروح بتصرُخ بالآهات..واليأس جوايا إنتشَر
ليلة مماتك يابا حاضرة في بالي مش ممكن تغيب
أول موبايلي ما رَن شُفت الإسم كان والدي الحبيب
كان إتصالك بيا على بعد العِشا
إلحقني يابني دا الألم سكاكين بتقطع في الحَشا
وجريت عليك ودخلت أوضتك وانت نايم عالسرير
ساعة ما شُفتك إبتديت أتمنى إني أكون ضرير
جسمك مِتلج والدموع ماليين عينيك
طاب قول لي يابا أعمل إيه وانا روحي ليك
والله لو ينفع أشيل كبدك وتاخُد كبدي فيك
والله يابا العُمر كلُه ما يغلى يوم أبداً عليك
ويوميها قُلت ماتقلقوش
هانت أكيد حالاً هاروق
سيبوا البيبان مِتفتحة
وماتحجبوش ضوء الشروق
لو بيتي كان مقفول
هايدخُل موتي من بين الشقوق
آخر كلامك كان شهادة نطقتها والصمت طال
هزّيت كِتافك وإنت مش سامع نِدايا والسؤال
ما ترُد يابا سكتت ليه؟
والنبض ليه ساب العروق
إستني يا امّه مماتش لسه دا نام أكيد حالاً يفوق
ما تقول لي عينك مالها ليه قَلبت بَياض
جاوب ورُد وقول باهزر إيه ياواد
إضربني يابا بالقلم
وأنا خَدي يحضُن ضربتك
وقابلني يابا على الطريق
نوّر حياتي بـ ضحكتك
إحضُنني يابا وضُمني
كسّر ضلوعي بـ ضمتك
إزاي هعيش في الكون بدون ماتكون معايا نظرتك
هتسيبني بعد الموت لمين
مين اللي زيك في الحياة مُخلص أمين
ويوميها غسّلتك بإيدي وقلبي كان مَنثور فُتات
لفينا جسمك في الكفن..كفنك يابويا تلات راقات
ورفعنا بيك النَعش ومشينا بنبكي في مَشهدَك
وانا كنت بادعي في سِري وسط الخلق ربي أُشهدك
في السِكة جاي لَك عيد عسل
والله وصّاني أخلّي القلب ينبُض بالإيمان مهما حصل
والله علمني أكون ضد الفجور والكدب والخوف والكَسل
يارب أبويا في الحياة حارب همومُه وماانتصر
وفضلت أدعي وعند باب القبر صلّينا عليك
كانت الصلاة من غير ركوع
ودَعينا ليك وبإيدي دخلتك هِنا
والرمل كان مَخلوط دموع
وقفلنا باب المقبرة
ووقفت أعيط بالقوي وسط الجموع
سَندوني ناس ماعرفش مين
حَضنوني ناس ماعرفش مين
أنا وحدي وسط الناس حزين
ناسي منين السِكة ومنين الرجوع
ورجعت بيتنا بـ مُعجزة
أنا كنت واقف في العَزا
وباشوفها صورتك ثابتة على كل الوشوش
وبَقيت أخاف لو ثانية أغمض تختفي
من يومها فاتح عيني حالف مايناموش
عالقبر يابا جيت بـ قلبي باكلمك
وحياة غلاوتي بأمّنك
لو حد جالك قبل موتي
وحَب يدخُل جوة حُضنك إقفلُه وماتفتحوش.
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
