جنّة الرحمن
…………..
تلات ألوان
علم رايه
وضلايه
ونسر ف وسطهم فارد
جناح الشوق يغنّيلك
هنا الأحمر
بعطر الورد بيصبّح
على هرمك
يا مصر وقلبه بيقولّك
أنا العاشق مواويلك
هنا الأبيض
بلون قلب الولاد فيكي
ولون الضحكه ف عينيكي
وطعم الطهر يا طاهره
ولون صبحك وقنديلك
هنا الأسمر
عشان لون البياض يظهر
بيتمايل وبيرفرف
ماهو الواخد سمار نيلك
بقرآنك وإنجيلك
ح تفضل رايتك العاليه
ترفرف فوق تراب أرضك
يا صانعه المجد من مجدك
وأرضك حبله وللاده
يا صانعه المجد من مجدك
ومجدك طعمه بزياده
كفايه يادوب نشوف إبنك
بيجري كأنه بيسابق
ملايكة ربّه بشهاده
يا رايه سجودها لعباده
ونور بينوّر الأركان
زمان كان الجميع ييجي
ويطلب منّك الإحسان
طبيعتك تدّي ما تحوشي
طبيعتك جنة الرحمن
و كل الكون بيستنّى
يادوب شمسك يا مصر تبان
وحتى الشمس بتغنّي
عشانك أجمل الألحان
ف لحظة م الهوا ييجي
يزغزغ رايتك العاليه
يا غاليه
بالتلات ألوان
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
