************
حابب أعيش دايما ليكي
شاعر بيكتب غناوكي
علي شط نيلك وقنالك
نايم ف حضنك علي شالك
وعشان ما يعلي ف يوم شانك
لازم تصوني اللي حاميكى
حابب أعيش دايما جنبك
عاشق متيم وبحبك
يا صاحبة النبض الساكن
من حُبك ابني لي مساكن
وبلاش من اللون الداكن
يفصل مابين قلبي وقلبك
حابب أكون ليكي المصنع
وايد بتبني وايد تزرع
وازرع ف أرضك حكاويكي
عن شعب عاشق لعينيكي
بتحني من دمه ايديكي
رافض لغير الله يركع
حابب أعيش وبدون عٍلة
وأدور بدون الفرقلة
واشرب من القلة وٱبلع
وف حضنك انتي انا أدلع
وجدوري ف الأرض تفرع
واطرح شعاع شمس وضلة
حابب أكون ليكي الساري
وعلم مرفرف ف العالي
وتعالي نبني جسور بينا
توصل يا روحي اللي مابينا
م احنا اللي عشقاكي عيونا
وانتي اللي دايما بتلالي
حابب اكون ليكي الكحلة
ف عيون معاها الليل يحلا
ورداية فوق خدك طارحة
جمال ومتلون فرحة
يا ام الملاية والطرحة
حاسبي من السكة الوحلة
حابب أكون ليكي سلاحك
نصر وسلام يشفي جراحك
وتقربي حبة بحبة
وأقعد معاكي علي التبة
لو تسمحي ٱو يوم حابة
تبقي الحياة واحنا صباحك
حابب اكون ليكي المخلة
طرح الجناين والنخلة
وان يوم عطشتي ٱنا ارويكي
من نيل بيجري ف أراضيكي
حابب أعيش عمري أرضيكي
لأجل. الحياه فيكي ما تحلا
حابب أكون شمس نهارك
وٱدفي سطحك وجدارك
وان زارك الحزن تلاقي
طعم الدوا من أشواقي
باقية عليا وٱنا باقي
لحن الحنان بين ٱوتارك
حابب أكون ليكي الفرحة
متحزمة بمليون طرحة
بعد الكتاب نعمل ز فة
ومعاكي أرقص ع الضفة
وف مركبة جنب الدفه
نتخفي م الموجة المالحة
حابب أكون انسان صالح
وازرع من الحب مطارح
تطرح أغاني الشوق ليكي
وتحني م الفرحة ايديكي
وف نن عيني أخبيكي
يا حنينة وخيرك طارح
حابب اكون ليكي القمرة
ومعاكي تحلو السهرة
من شوقي ليكي أغنيلك
وتسري فرحي ف منديلك
حابب أكون لك قنديلك
والنني ف عينيكي السمرة
حابب أكون ليكي سماكي
وسحابة بيشيلها هواكي
واختار ترابك وأنزله
واروي اللي طارح من فله
وف ودنه اهمس وٱقوله
سبحانه وحده اللي رعاكي
***********************
رضا أبو الغيط
