قصيدة : حبة رضا ..مسابقة الشعر العامي ..بقلم / أشرف البنا

الاسم: أشرف سيد أبو الحسن
اسم الشهرة: أشرف البنا
العنوان: جمهورية مصر العربية – البحر الأحمر
الفئة: شعر العامية
رابط الصفحة : https://www.facebook.com/ashraf.hassan1
عنوان النص: حبة رضا

…… حبة رضا ….

لما القلوب الحب يهجر نبضها

لما الضماير يسكن الزيف أرضها

و يعشش الخوف في النفوس

سارح ف طولها و عرضها

لما المشاعر صابها داء النفسنة

وقت الطوفان الكل هيقول نفسي أنا

غول الأنا جوه البدن

ينبت شيطاني بين حنايا الشخصنة

لما الغرور ياخدك في بحر المغريات

عديت حدود كل الاصول لأجل الغايات

و إن أنت غير و اسمك خلاص طال السما

و الشورى شورتك في الأمور و المجريات

لا الجاه يوميها هينفعك ولا حتي مال

و حيطان عاليها ما يمنعك لو فجأة مال

دنيا تلاهي و الحياة مرماح………

مين كان عليها وقال أنا !!!!! … فين راح

عملك و بس هينجدك ف الشدة و الأهوال

الليل ستاير م الهواجس و القلق

ف بحر خوفك لسه حاسس بالغرق

حلمك و تايه ف الليالي المظلمة

إزاي تعافر ف الحياة بمركب ورق

و لفين هنهرب لو يضيق بينا الفضا

و الصوت معادش يتسمعله هناك صدي

لما الوسع حتي البراح ميكفيناش

جوانا لسه حاجات كتير ومعيشنهاش

و منين هتيجي الراحة و البال يوم يروق

و لا قيد و طوق … لو ف النفوس حبة رضا

@ أشرف البنا